Shavkat Mirziyoyev Turkiya milliy bayrami — Respublika e’lon qilingan kunning 100 yilligi munosabati bilan Rajab Toyyib Erdo‘g‘onga tabrik yo‘lladi. Bu haqda Prezident matbuot kotibi xabar berdi.
Maktubda xalqlar o‘rtasidagi umumiy til, mushtarak urf-odatlar, o‘zaro hurmat va hamjihatlik tamoyillariga asoslangan keng qamrovli strategik sheriklik aloqalari so‘nggi yillarda sifat jihatidan yuksak bosqichga ko‘tarilib, munosabatlaridagi yangi tarixiy davrni boshlab bergani katta mamnuniyat bilan ta’kidlangan.
“Nasib etsa, Siz bilan birgalikda xalqlarimizning umumiy ravnaqini ta’minlash yo‘lida kelishib olgan barcha yirik loyiha va aniq dasturlarni to‘liq amalga oshiramiz hamda ko‘zlagan ulkan marralarimizga albatta erishamiz”, — deyiladi jumladan qutlovda.
Davlat rahbari Turkiya yetakchisi va oila a’zolariga sihat-salomatlik, farovonlik va baxt-saodat, mas’uliyatli davlatchilik faoliyatida yangi zafarlar, qardosh turk xalqiga esa tinchlik-omonlik, bardavom taraqqiyot va yuksalishlar yor bo‘lishini tiladi.
Turkiyada Respublika kuni 1923-yildan buyon har yili nishonlanib kelinadi. 1923-yil 29-oktabrda Mustafo Kamol Otaturk Turkiyani Respublika deb e’lon qilgan va bu voqea sharafiga milliy bayram sifatida Respublika kuni tashkil etilgan. Turkiya 1920-yilning 23-aprelida Turkiya Buyuk Millat Majlisi tashkil etilgandan beri amalda respublika bo‘lgan, biroq Turkiya Respublikasining rasmiy eʼlon qilinishi oradan uch yarim yil o‘tibgina sodir bo‘lgan.
Izoh (0)