Шавкат Мирзиёев Туркия миллий байрами — Республика эълон қилинган куннинг 100 йиллиги муносабати билан Ражаб Тоййиб Эрдўғонга табрик йўллади. Бу ҳақда Президент матбуот котиби хабар берди.
Мактубда халқлар ўртасидаги умумий тил, муштарак урф-одатлар, ўзаро ҳурмат ва ҳамжиҳатлик тамойилларига асосланган кенг қамровли стратегик шериклик алоқалари сўнгги йилларда сифат жиҳатидан юксак босқичга кўтарилиб, муносабатларидаги янги тарихий даврни бошлаб бергани катта мамнуният билан таъкидланган.
“Насиб этса, Сиз билан биргаликда халқларимизнинг умумий равнақини таъминлаш йўлида келишиб олган барча йирик лойиҳа ва аниқ дастурларни тўлиқ амалга оширамиз ҳамда кўзлаган улкан марраларимизга албатта эришамиз”, — дейилади жумладан қутловда.
Давлат раҳбари Туркия етакчиси ва оила аъзоларига сиҳат-саломатлик, фаровонлик ва бахт-саодат, масъулиятли давлатчилик фаолиятида янги зафарлар, қардош турк халқига эса тинчлик-омонлик, бардавом тараққиёт ва юксалишлар ёр бўлишини тилади.
Туркияда Республика куни 1923 йилдан буён ҳар йили нишонланиб келинади. 1923 йил 29-октябрда Мустафо Камол Отатурк Туркияни Республика деб эълон қилган ва бу воқеа шарафига миллий байрам сифатида Республика куни ташкил этилган. Туркия 1920 йилнинг 23 апрелида Туркия Буюк Миллат Мажлиси ташкил этилгандан бери амалда республика бўлган, бироқ Туркия Республикасининг расмий эълон қилиниши орадан уч ярим йил ўтибгина содир бўлган.
Изоҳ (0)