O‘zbekiston qonunchiligida 2023-yil 1-noyabrdan bir qator o‘zgarish va yangiliklar kuchga kiradi. Norma ushbu sanadan kuchga kiradigan milliy qonunchilikdagi asosiy o‘zgarishlar sharhini taqdim etdi.
Psixologik yordam olish osonlashadi
Tuman (shahar)larda “Inson” ijtimoiy xizmatlar ko‘rsatish markazlarida og‘ir hayotiy vaziyatga tushgan shaxslar uchun psixologik yordam ko‘rsatish tizimi joriy etiladi.
Davlat organlarining kadrlarga oid hujjatlari hrm.argos.uz platformasida saqlanadi
Respublika va mahalliy ijro etuvchi hokimiyat organlarida inson resurslarini boshqarishga oid barcha maʼlumot va hujjatlar “hrm.argos.uz” elektron platformasida shakllantiriladi va yuritiladi.
Xonadonlarga internet tarmog‘ini olib borish dasturi amalga oshiriladi
“Oxirgi milya” tamoyili asosida tadbirkorlik subyektlari bilan birgalikda aholi xonadonlariga internet tarmog‘ini olib borishga qaratilgan hamkorlik dasturini amalga oshirish boshlanadi.
Hokimlar shaharsozlik bo‘yicha kurslarda o‘qiydi
Qurilish vazirligi tomonidan mahalliy hokimiyat va hududiy tashkilotlar rahbarlari uchun shaharsozlik sohasida bilimlarni oshirishga qaratilgan o‘quv mashg‘ulotlari o‘tkaziladi.
Avtoraqamlarni berish uchun to‘lov miqdorlari oshadi
Avtotransport vositalari uchun davlat raqami belgilari berilganligi uchun to‘lov BHMning 3,5 baravarini (hozirda 1,5 baravari), mototransport uchun — BHMning 1,75 baravarini tashkil etadi (hozirda — 0,75 baravari).
Umra xizmatini tashkil etuvchilar uchun yangi litsenziya talablari
Umra xizmatlarini ko‘rsatish faoliyati bo‘yicha quyidagi qo‘shimcha litsenziya talablari kuchga kirmoqda:
- 100 ming AQSH dollari ekvivalentidan kam bo‘lmagan miqdordagi mablag‘larni Turizm qo‘mitasining Xavfsiz turizm jamg‘armasiga zaxira qilib qo‘yish;
- Umra xizmatlarini ko‘rsatuvchi turoperator shtatida diniy (islomiy) taʼlim yo‘nalishlari bo‘yicha respublika taʼlim muassasasi yoki O‘zbekiston xalqaro islom akademiyasining tegishli bakalavriat taʼlim yo‘nalishi yoxud magistratura mutaxassisligi bitiruvchisi bo‘lgan kamida bir nafar mutaxassisning bo‘lishi.
Yong‘in nazorati sohasida yangi talablar
Davlat yong‘in nazorati organlarining ijobiy xulosasini olmasdan, qishloq xo‘jaligiga mo‘ljallanmagan yer uchastkalarini auksionga chiqarish, qurilish obyektlari loyiha-smeta hujjatlarini kelishish hamda qurilish-montaj ishlari tugallangan obyektlardan foydalanish uchun ruxsatnoma berish taqiqlanadi.
Davlat yong‘in nazorati organlari qurilish obyektlarida qurilish-montaj ishlarini amalga oshirish jarayonida shaharsozlik normalari va qoidalarining yong‘in xavfsizligi talablariga rioya etilishini nazorat qiladi.
Aholi gavjum bo‘ladigan obyektlarda yong‘in xavfsizligi talablariga rioya etilishi ustidan majburiy tartibda idoraviy yong‘in nazorati o‘rnatiladi.
Davlat ishtirokidagi korxonalarda davlat vakillarining ishtirok etish tartibi kuchga kiradi
16-noyabrdan davlat ishtirokidagi korxonalardagi davlat vakillarining faoliyatini amalga oshirish tartibi to‘g‘risida nizom kuchga kiradi.
Toshkent shahrida jamoat transportlarida yo‘l haqi yangicha tarif asosida hisoblanadi
Poytaxt jamoat transportida yangi, qo‘shimcha va rag‘batlantiruvchi tariflar joriy etilmoqda. Unga ko‘ra, bir yo‘lovchi qatnovi uchun cheklangan tariflar naqd pul va bank kartalarti orqali 2000 so‘m, ATTO transport kartalari orqali to‘lov uchun esa 1700 so‘m etib belgilanmoqda.
Yo‘lovchilar ATTO transport kartalaridan foydalangan holda bir soat ichida ikkinchi marotaba avtobusdan foydalansalar yo‘l haqi uchun 700 so‘m to‘laydi. Bir soat davomida yo‘lovchilar avtobusdan uchinchi va to‘rtinchi marotaba maʼlum bir manzilga harakatlanishi esa mutlaqo bepul bo‘ladi.
Izoh (0)