Ijtimoiy tarmoqlarda “Kuyov arab shayxlariga havas qilgan ko‘rinadi” nomli to‘y marosimi aks etgan video tarqalib, aholi orasida keskin muhokamalarga sabab bo‘ldi. IIV matbuot xizmati videoda aks etgan holat bo‘yicha ma’lumot berdi.
Aniqlanishicha, mazkur tadbir 31-avgust kuni Namangan viloyatida o‘tkazilgan bo‘lib, unda kuyov sifatida ishtirok etgan 2000-yilda Namangan viloyatida tug‘ilgan fuqaro I.A. viloyat IIBga taklif etildi.
O‘tkazilgan suhbat davomida u o‘z tashabbusi bilan shaxsiy diniy qarashlaridan kelib chiqqan holda to‘yda kelinga noanʼanaviy kiyimlar (burqa shaklidagi) kiydirib hamda diniy kuy-qo‘shiqlardan foydalanib, tadbirga diniy tus berganini bildirgan.
“Xotin-qizlar va erkaklar uchun teng huquq hamda imkoniyatlar kafolatlari to‘g‘risida”gi qonunga asosan, jins bo‘yicha bilvosita kamsitish, yaʼni bir jinsdagi shaxslarni boshqa jinsdagi shaxslarga nisbatan noqulayroq holatga tushirib qo‘yadigan vaziyatlarni, holatlarni yoki mezonlarni yaratish, shu jumladan, gender tengsizlikni ommaviy axborot vositalari, taʼlim, madaniyat orqali targ‘ib etish, muayyan jinsdagi shaxslar uchun salbiy oqibatlarga olib kelishi mumkin bo‘lgan shart-sharoitlar yoxud talablar belgilanishiga yo‘l qo‘yilmaydi. Ushbu qonunning 29-moddasida xotin-qizlar va erkaklar uchun teng huquq hamda imkoniyatlar kafolatlari to‘g‘risidagi qonunchilikni buzganlik uchun javobgarlik belgilangan.
“Vijdon erkinligi va diniy tashkilotlar to‘g‘risida”gi qonunning 10-moddasiga binoan, mamlakatda hududida diniy mazmundagi materiallarni tayyorlash va tarqatish dinshunoslik ekspertizasining ijobiy xulosasi olinganidan keyin amalga oshiriladi. Ushbu qonunning 5-moddasiga ko‘ra, mamlakatda vijdon erkinligini taʼminlashning asosiy ustuvorliklaridan biri sifatida jamoat tartibiga, fuqarolarning sog‘lig‘i va axloqiga, huquq va erkinliklariga tahdid soluvchi diniy g‘oyalar hamda qarashlarning singdirilishi va tarqatilishiga qarshi kurashish belgilab qo‘yilgan.
Shu munosabat bilan, sud tomonidan fuqaro I.A.ga nisbatan Maʼmuriy javobgarlik to‘g‘risidagi kodeksning 184-2-moddasi (diniy mazmundagi materiallarni qonunga xilof ravishda tayyorlash, saqlash, olib kirish yoki tarqatish) bilan BHMning 5 barobari (1 million 650 ming so‘m) miqdorida jarima jazosi tayinlangan.
Izoh (2)
Har kim oʻzi xohlagan narsani kiyishga haqqi bor qonunda arabcha kiyinish mumkinmas deb yozilgan joyi bormi???Undan koʻra Munisa Rizayevani shtraf qilinglar.
нимага хамма нарсани айлантирип гапиришади