Prezidentning tegishli qarori bilan Farrux Sharipov, Farxodjon Tashpulatov, Olim Omonov sog‘liqni saqlash vaziriga o‘rinbosar etib tayinlandi. Bu haqda vazirlik matbuot xizmati xabar berdi.
Farrux Sharipov 1969-yilda Samarqand viloyatida tug‘ilgan. 1993-yil Samarqand davlat tibbiyot instituti, 2010-yil Toshkent davlat iqtisodiyot universitetini tamomlagan.
2002—2009-yillarda Toshkent tuman tibbiyot birlashmasi boshlig‘i, 2009—2012-yillarda Sirdaryo viloyati sog‘liqni saqlash boshqarmasi boshlig‘i lavozimlarida mehnat qilgan. 2012—2014-yillarda Sog‘liqni saqlash vazirligi bosh boshqarma boshlig‘i bo‘lgan. 2015—2016-yillarda Yakkasaroy tuman tibbiyot birlashmasi boshlig‘i lavozimida ishlagan.
Tayinlovga qadar 2021-yildan buyon Vazirlar Mahkamasi huzuridagi Davlat tibbiy sug‘urtasi jamg‘armasi ijro etuvchi direktori vazifasida ishlab kelayotgan edi.
Farhodjon Tashpulatov 1983-yilda Toshkent shahrida tug‘ilgan. 2004-yilda O‘zbekiston davlat jahon tillari universiteti, 2005-yilda Toshkent davlat iqtisodiyot universiteti qoshidagi ixtisoslashtirilgan Oliy biznes maktabini tamomlagan.
2006—2007 yillarda “Parvina sug‘urta” sug‘urta kompaniyasi Toshkent shahri direksiyasi direktori, 2007-2010 yillarda “O‘zbekinvest Hayot” sug‘urta kompaniyasi menejeri, bosh menejeri lavozimlarida mehnat qilgan. 2011—2021 yillarda Vazirlar Mahkamasida bir qancha mas’ul vazifalarda ishlagan.
Tayinlovga qadar 2021-yildan buyon “O‘zagrosug‘urta” aksiyadorlik jamiyati boshqaruvi raisining o‘rinbosari lavozimida faoliyat ko‘rsatib kelayotgan edi.
Olim Omonov 1979-yilda Samarqand viloyatida tug‘ilgan. 2001-yilda Toshkent elektrotexnika aloqa instituti, 2006-yilda Toshkent axborot texnologiyalari universiteti magistratura bosqichi, 2010-yilda Prezident huzuridagi Davlat va jamiyat qurilishi akademiyasini tamomlagan.
2005—2011-yillarda “O‘zbektelekom” AK UzNet filiali bo‘lim boshlig‘i, 2011—2018-yillarda Vazirlar Mahkamasida bir qancha masʼul lavozimlarda mehnat qilgan. 2018—2021-yillarda Axborot texnologiyalari va kommunikatsiyalarini rivojlantirish vazirligi tizimidagi Axborot-kommunikatsiya texnologiyalarini rivojlantirish jamg‘armasi direktori vazifasida ishlagan.
Tayinlovga qadar 2023-yil fevralidan buyon “Chorvoq” turistik rekreatsion zona direksiyasi DUK direktori lavozimida ishlab kelayotgandi.
Izoh (0)