Surxondaryo viloyati bojxona boshqarmasining “Sariosiyo” chegara bojxona postida yuk mashinasidan salkam 70 kg narkotik modda topildi. Bu haqda “Daryo”ga boshqarma axborot xizmati rahbari Shohruz O‘rolov xabar berdi.
Ta’kidlanishicha, bojxonachilar yirik miqdordagi giyohvandlik vositalarini mamlakatga yashirin usullar bilan olib kirilishiga chek qo‘ygan.
Surxondaryo viloyati bojxona boshqarmasining “Sariosiyo” chegara bojxona postida respublikamizga kirib kelgan yuk avtotransport vositasi inspeksion ko‘rik majmuasi orqali ko‘zdan kechirilganda hujjatlarda ko‘rsatilgani kabi “bo‘sh” emasligi aniqlandi.
Bojxona xodimlari va Davlat xavfsizlik xizmati chegara qo‘shinlari harbiy xizmatchilari bilan hamkorlikda avtotransport vositasida chuqurlashtirilgan bojxona ko‘rigidan o‘tkazilganida, uning kabinasidagi ko‘z ilg‘amas bo‘shliqlarga 66 ta o‘ramlar yashirilganligi fosh bo‘ldi.
Mazkur o‘ramlar ochib ko‘rilganda esa ularning 30 tasida 31,9 kg og‘irlikda geroin, 36 tasida esa 37,3 kg og‘irlikdagi gashish giyohvand vositasi joylangani ma’lum bo‘ldi, — deydi Shohruz O‘rolov.
Aniqlashtirilishicha, ushlab qolingan giyohvandlik vositalarining og‘irligi o‘rami bilan hisoblaganda 69,2 kg ni tashkil qilgan.
Hozirda holat yuzasidan bojxona organlari tomonidan jinoyat ishi qo‘zg‘atilib, tergovga qadar tekshiruv harakatlari olib borilmoqda.
Izoh (0)