Germaniyada ish haqini saqlab qolgan holda ish haftasini to‘rt kungacha qisqartirish bo‘yicha tajriba o‘tkaziladi, natijani Intraprenör konsalting kompaniyasi va Myunster universiteti olimlari baholaydi. Bu haqda Intraprenör RND agentligiga ma’lum qildi.
Tadqiqotda turli sohalardagi 50 dan ortiq kompaniya ishtirok etishi kutilmoqda. 1-sentabrdan tajribada qatnashish bo‘yicha arizalar qabul qilinmoqda. 2024-yil 1-fevralidan boshlab qatnashuvchi kompaniyalar yarim yilga 4 kunlik ish haftasiga o‘tadi. Ishchilarning maoshi esa qisqarmaydi, saqlanib qoladi.
Intraprenör kompaniyalarga maqbul ish vaqtini tanlashda yordam beradi. Barcha kompaniyalar va xodimlar uchun yagona ish modeli ko‘zda tutilmagan.
Tadqiqotning ilk natijalari 2024-yil may oyida ma’lum bo‘ladi. Yakuniy xulosalar esa oktabr oyida e’lon qilinadi. Ushbu loyiha ishtirokchi kompaniyalarning o‘zi tomonidan moliyalashtiriladi. Davlat yordami haqida xabar berilmagan.
Tajribaning asosiy maqsadi haftasiga besh emas, to‘rt kun ishlayotgan xodimlar chindan ham o‘z hayotidan ko‘proq qoniqishi, o‘zini sog‘lom his qilishi, shifokorlarga kamroq tashrif buyurishi hamda ish unumdorligi o‘zgarmasligini aniqlashdan iborat.
Izoh (0)