Rossiya bosqini boshlanganidan beri Ukraina G‘arbdagi hamkorlaridan 100 milliard dollarlik harbiy yordam oldi. Bu haqda Ukraina mudofaa vaziri lavozimidan iste’foga chiqayotgan Aleksiy Reznikov “Ukrinform” agentligiga bergan intervyusida ma’lum qildi.
Uning so‘zlariga ko‘ra, ushbu summaga nafaqat harbiy texnika, balki qurol-yarog‘, o‘q-dorilar va snaryadlar ham kiradi. Barcha yordamning yarmidan ko‘pi — deyarli 60 milliard dollarni Ukraina AQSHdan olgan.
Reznikovning taʼkidlashicha, hozirda Kiyev uchun havo mudofaasi ustuvor vazifa bo‘lib qolmoqda.
“Bu Patriot, NASAMS, Gepard ga o‘xshash SAMP/T, Iris-T, Crotale kabi yangi zamonaviy tizim komplekslari; Stinger, Starstreak kabi qo‘lda boshqariladigan zenit-raketa komplekslari; Bular turli xil granatalar, tankka qarshi tizimlar va boshqalar”, — deya sanadi Reznikov.
“Va, albatta — aviatsiya, chunki aviatsiya havo mudofaasining bir qismidir, aviatsiya platformasi havo nishonlarini — qanotli ballistik raketalardan tortib ularni tashlaydigan samolyotlar, shu jumladan, dronlar, Shahed lar va boshqalarni urish imkonini beradi. Bugun biz F-16 qiruvchi samolyotlarini olishimiz ham aniq bo‘lib turibdi”.
Vazirning so‘zlariga ko‘ra, Amerikaning F-16 qiruvchilari Ukrainaga 2024-yil bahorida yetkaziladi.
“Men ularni ishlatish allaqachon boshlanganini ko‘ryapman. Chunki bugungi kunda mashg‘ulotlar uchun ruxsatnoma bor, o‘qitishga rozi bo‘lgan davlatlar ham bor, hattoki, mashg‘ulotlar yakunlanib, infratuzilma tayyorlangach, F-16 samolyotlarini bizga berishga rozi bo‘lgan davlatlar ham bor”, — deya qo‘shimcha qildi u.
Avval Niderlandiya, Daniya va Norvegiya ukrainalik uchuvchilar o‘quv mashg‘ulotlarini tugatgandan so‘ng F-16 qiruvchi samolyotlarini Kiyevga topshirishi haqida ma’lum qilgandi.
Izoh (1)
Ёрдам пули эмас. Карз деб айтинглар. Маьлумоттлар тугри равишда айтилиши керак. Гарб хеч качон шунчаки ёрдам бермайди, максадсиз "ёрдам" бермайди.