Janubiy Afrika Respublikasi prezidenti Siril Ramafosaning aytishicha, tergovda Rossiyaga qurol yetkazib berilganiga oid hech qanday dalil topilmagan. Bu haqda u o‘z xalqiga murojaatida aytib o‘tdi, deb yozadi Sky News.
“Rossiyaga qurol yetkazib berish haqidagi ayblovlarning hech biri tasdiqlanmadi. Qurol eksportiga ruxsat berilmagan va hech qanaqa qurol eksport qilinmagan”, — dedi Ramafosa.
Gap AQSHning ayblovlari haqida ketmoqda, unga ko‘ra JAR Amerika sanksiyalari ostida bo‘lgan Rossiyaning Lady R kemasiga qurol ortgan.
Bahorda AQSHning JARdagi elchisi Ruben Brigete 2022-yil dekabr oyida Saymonstaun harbiy-dengiz bazasida Rossiya yuk kemasi to‘xtab turgani qayd etilganini aytgandi. Elchi kemaga qurol va o‘q-dorilar ortilganiga ishonch bildirdi.
Keyinchalik, JAR mudofaa vaziri Tandi Modize ayblovlarni rad etdi, Ramafosa esa ishni tekshirishga va’da berdi.
JAR Tashqi ishlar vazirligi AQSH elchisi o‘z ayblovlari uchun “so‘zsiz kechirim so‘raganini” ma’lum qildi.
Eslatib o‘tamiz, yanvar oyida The Wall Street Journal Kreml uchun qurol-yarog‘ tashiydigan rus kemasi Lady R dekabr oyida JARning eng yirik harbiy-dengiz bazasida transponderni o‘chirgan holda yashirincha bog‘lab qo‘yilgani, u yerga noma’lum yuklar tushirilgani va ortilgani haqida xabar bergandi.
Izoh (0)