Rossiya va Turkiya prezidentlari Vladimir Putin va Rajab Toyyib Erdo‘g‘on bugun, 4-sentabr kuni Sochida bo‘lib o‘tadigan muzokaralarda Qatar ishtirokida Rossiya g‘allasini Turkiya orqali Afrikaga yetkazish imkoniyatlarini muhokama qiladi. Bu haqda Anqaradagi siyosiy doiralardagi manbaga tayanib, “TASS” xabar berdi.
“Qatar moliyaviy ko‘magida Rossiyadan Turkiya orqali Afrikaning muhtoj mamlakatlariga g‘alla yetkazib berish ssenariysi prezidentlar kun tartibida bo‘ladi”, — dedi agentlik manbasi.
Manbaga ko‘ra, muzokaralarning asosiy mavzusi don bitimi bo‘lishi kerak. Erdo‘g‘on BMTning yangi shartlarini hisobga olgan holda kelishuvni davom ettirish masalasini ko‘tarishni rejalashtirmoqda.
Shuningdek, siyosatchilar uchrashuvda Turkiyada gaz xabi yaratish va Rossiya tabiiy gazini mamlakat orqali Yevropaga yetkazib berish loyihasini ham muhokama qiladi, dedi manba.
O‘z navbatida, Turkiya OAV xabar berishicha, Erdo‘g‘on Putin bilan uchrashuvda Ukrainadagi urushni tinch yo‘l bilan hal qilish bo‘yicha muzokaralarda Turkiya vositachiligini taklif qilmoqchi.
Rossiya va Ukraina o‘rtasidagi don shartnomasi Turkiya va BMT vositachiligida 2022-yil iyul oyida tuzilgan edi. Kelishuv muddati 2023-yil 17-iyulda tugadi. Rossiya hukumati kelishuvning Moskvaga taalluqli qismlari bajarilmagani sababli u to‘xtatilganini e’lon qildi. 18-iyuldan beri Rossiya qo‘shinlari Ukraina port infratuzilmasi obyektlariga, jumladan, Odessaga hujum qilmoqda. Rossiya Mudofaa vazirligi buni Qrim ko‘prigidagi portlash uchun “qasos” deb atamoqda.
Izoh (0)