Turkiya janubi-g‘arbida joylashgan Denizli shahrida 16 soatlik farq bilan ikkita yo‘l-transport hodisasi yuz berdi, ularda 90 dan ortiq kishi tan jarohati oldi, 11 kishi halok bo‘ldi, deb xabar bermoqda Hurriyet gazetasi.
Birinchi avtohalokatda yetti kishi halok bo‘lgan, 42 kishi jarohatlangan. Honaz tumanida qum va plitalar ortilgan yuk mashinasi haydovchisi boshqaruvni yo‘qotib, to‘siqlardan buzib o‘tgan va qarama-qarshi tomondan kelayotgan avtobusga borib urilgan. TGRT Haber telekanali xabariga ko‘ra, avtobusni to‘yga ketayotgan qarindoshlar ijaraga olgan.
Oradan 16 soat o‘tgach, yana bir YTH sodir bo‘ldi: yo‘lovchi avtobusi yo‘lovchi avtomobili bilan to‘qnashdi, mashina zarba tufayli qarama-qarshi yo‘lakka chiqib ketdi va boshqa mikroavtobusga borib urildi. Hodisa oqibatida bir oilaning to‘rt a’zosi halok bo‘ldi, 53 kishi tan jarohati oldi.
Avval Ukrainaning Vinnitsa viloyatida yog‘och ortilgan yuk mashinasi va yengil avtomashina to‘qnashuvi oqibatida mashinadagi 12 kishi halok bo‘lgandi. Qurbonlarning barchasi — ular orasida 2 yoshdan 12 yoshgacha bo‘lgan olti bola ham bor — bir oila a’zolari edi. YTH vaqtida ularning barchasi eski “Jiguli”da bo‘lgan.
Tojikistonda esa yuk mashinasi bir nechta avtomobillarni bosib, uylarga borib urilgan, 10 kishi halok bo‘lgan.
Izoh (0)