Toshkent shahar Mirobod tumanidagi poliz mahsulotlarini qadoqlash sexida 6 mingdan ziyod xonadonning bir oylik iste’moliga teng hajmdagi tabiiy gazdan noqonuniy foydalanib kelingani aniqlandi, deb xabar beradi Energetika vazirligi matbuot xizmati.
Qayd etilishicha, vazirlik huzuridagi “O‘zenergoinspeksiya” tomonidan Toshkent shahar prokuraturasi va “Hududgaz Poytaxt” GTF xodimlari bilan hamkorlikda tezkor tadbir o‘tkazilgan. Tadbirda tumanning “Oltinko‘l” mahallasi, A.Fitrat ko‘chasida yashovchi fuqaro A.F.ga tegishli poliz mahsulotlarini qadoqlash sexida tabiiy gazdan noqonuniy foydalanib kelingani ma’lum bo‘lgan.
Iste’molchi tomonidan gazlashtirish uchun zarur hujjatlarni rasmiylashtirmasdan gaz tarmog‘iga o‘zboshimchalik bilan ulanib foydalangani natijasida dastlabki hisob-kitoblarga asosan tizimga jami 824 million 417 ming 510,4 so‘m (1 million 249 ming 117,44 kub metr) miqdorida zarar yetkazilgan.
Ushbu hajmdagi tabiiy gaz bugungi kunda 6 mingdan ziyod xonadonning bir oylik isteʼmolini tashkil qiladi. Aniqlangan holat yuzasidan rasmiylashtirilgan hujjatlar belgilangan tartibda huquqni muhofaza etuvchi organlarga taqdim qilindi.
Gazdan noqonuniy foydalanish holatlari
Bundan oldin O‘zbekistonning bir qancha hududida gaz ta’minoti xodimlari tabiiy resurslardan noqonuniy foydalangani aniqlangandi. Xususan, Izboskan tumanida ko‘mir yoqilg‘isini qayta ishlash sexiga o‘rnatilgan elektr hisoblash uskunasiga tashqi ta’sir o‘tkazish orqali jami 374,4 million so‘m elektr energiyasidan noqonuniy foydalanilgan. Shuningdek, Namangan shahrida ohak pishirish xo‘jaligi 4 milliard so‘mdan ortiq tabiiy gazdan noqonuniy foydalanib kelgani to‘g‘risida xabar berilgandi.
Izoh (0)