“O‘zenergoinspeksiya” huquqni muhofaza qilish organlari va “Hududgazta’minot” AJ xodimlari bilan hamkorlikda Toshkent viloyati hamda Toshkent shahrida joylashgan avtomobillarga gaz to‘ldirish kompressor shoxobchalarida tezkor tadbir o‘tkazdi. Bu haqda Energetika vazirligi matbuot xizmati xabar berdi.
Qayd etilishicha, Toshkent viloyatining Piskent tumanida joylashgan “Kamolot istiqlol ko‘makchisi” MCHJga qarashli 3 ta AGTKSHda o‘rnatilgan gazni hisobga olish uskunalarida nazorat qilinadigan maʼlumotlar isteʼmolchilar aralashuvi bilan qisman yo‘qotilishiga yo‘l qo‘yilgan. Yaʼni gazni hisobga olish uskunasining elektr taʼminoti tizimidan vaqti-vaqti bilan uzib qo‘yish yo‘li bilan isteʼmol qilingan tabiiy gaz hajmining haqiqiy ko‘rsatkichlari hisobotlardan yashirib kelingani aniqlangan.
Yuqoridagi holatlar natijasida “Kamolot istiqlol ko‘makchisi” MCHJga qarashli 3 ta AGTKSHning sanoat tarmog‘idagi ulanish nuqtasida isteʼmol qilingan tabiiy gaz hajmi hisobini yuritish uchun o‘rnatilgan EGXUlarining elektron xotira maʼlumotlari yo‘qotilishiga yo‘l qo‘yilgan.
Buning natijasida tabiiy gazdan noqonuniy foydalanilgani yuzasidan dalolatnoma rasmiylashtirilib, “Kamolot istiqlol ko‘makchisi” MCHJ-1 shoxobchasi tomonidan qiymati 1 milliard 302 million 579 ming so‘mlik (1 302 579 metr kub tabiiy gaz), “Kamolot istiqlol ko‘makchisi” MCHJ-2 shoxobchasida qiymati 4 milliard 623 million 523 ming so‘mlik (4 623 523 metr kub tabiiy gaz) va “Kamolot istiqlol ko‘makchisi” MCHJ-3 shoxobchasida esa 1 milliard 896 million 573 ming so‘mlik (1 896 573 metr kub tabiiy gaz) hajmda tabiiy gazdan noqonuniy foydalanganligi aniqlangan.
Shuningdek, Toshkent viloyati Chinoz tumanida joylashgan “Koshona poydevori” MCHJga qarashli AGTKSHda tabiiy gaz hajmini hisobga olish uchun o‘rnatilgan “AvtoPilot PRO” rusumli elektron hisoblagichga o‘rnatilgan bir marotabalik nazorat tamg‘asi qasddan buzilgani va hisoblagichdagi manifold qismi tenglashtiruvchi jo‘mraklari qisman ochiq holatdaligi aniqlangan.
Holat yuzasidan tegishli tartibda dalolatnoma rasmiylashtirilib, dastlabki hisob-kitoblarga asosan, 1 milliard 907 million 168 ming so‘mlik (1 907 168 metr kub tabiiy gaz) hajmda tabiiy gazdan noqonuniy foydalanilgani aniqlangan.
Sergeli tumanida joylashgan “Nur Ziyod fayz biznes” MCHJga qarashli AGTKSHda esa “AvtoPilot PRO” rusumli gaz hisobdoni o‘rganilganda, unga tashqi taʼsir ko‘rsatilganligi, yaʼni hisobdon manifold qismi tenglashtiruvchi jo‘mraklari ochiq holatdaligi maʼlum bo‘lgan.
Holat yuzasidan 1 milliard 324 million 800 ming so‘mlik (1 324 800 metr kub tabiiy gaz) hajmda tabiiy gazdan noqonuniy foydalanilgani aniqlangan.
Ushbu hajmdagi tabiiy gaz o‘rtacha 6 mingta xonadonning bir yillik isteʼmolini tashkil qiladi. Aniqlangan holatlar yuzasidan rasmiylashtirilgan hujjatlar belgilangan tartibda huquqni muhofaza etuvchi organlariga taqdim qilingan.
Jizzax, Andijon va Farg‘ona viloyatlarida elektrdan noqonuniy foydalanganlar 913,5 million so‘m zarar yetkazgani to‘g‘risida xabar berilgandi. Shuningdek, O‘zbekistonning uch viloyatida gaz va svetdan noqonuniy foydalanganlar qariyb 352 mln so‘m zarar yetkazgandi.
Izoh (0)