O‘zbekistonning bir qancha hududida gaz ta’minoti xodimlari tabiiy resurslardan noqonuniy foydalangani aniqlandi, deb xabar bermoqda Iqtisodiy jinoyatlarga qarshi kurashish departamenti axborot xizmati.
Unga ko‘ra, Bosh prokuratura huzuridagi departamentning Izboskan tuman bo‘limi tomonidan o‘tkazilgan tergovga qadar tekshiruvda “B.” MCHJ rahbari X.A. ko‘mir yoqilg‘isini qayta ishlash sexiga o‘rnatilgan elektr hisoblash uskunasiga tashqi ta’sir o‘tkazish orqali jami 374,4 million so‘m elektr energiyasidan noqonuniy foydalanib kelgani aniqlangan.
Shu kabi, departamentning Past Darg‘om tuman bo‘limi tomonidan o‘tkazilgan tergovga qadar tekshiruvda “Pastdarg‘omtumangaz” gaz ta’minoti bo‘limi operatori K.R. o‘ziga tegishli issiqxona va molxonani hech qanday hujjatsiz tijorat maqsadida umumiy foydalanishdagi tabiiy gaz tarmog‘iga o‘g‘rilik yo‘li bilan ulab, jami 237,3 million so‘mlik gazdan noqonuniy foydalanib kelgani aniqlangan.
Shuningdek, K.R. iste’molchilarning abonent raqamlarida mavjud qarzdorliklarini asossiz yo‘q qilib berish orqali davlat va jamiyat manfaatlariga 99,8 million so‘m zarar yetkazgan.
Departamentning O‘zbekiston tuman bo‘limi tomonidan DXX va IIB xodimlari bilan hamkorlikda o‘tkazilgan tezkor tadbirda fuqaro B.Y. “Qoratepa” MFY hududidagi ohak sexini umumiy foydalanishdagi gaz tarmog‘iga o‘g‘rilik yo‘li bilan ulab, jami 168,5 million so‘mlik tabiiy gazdan noqonuniy foydalangani aniqlangan.
Departamentning Zangiota tuman bo‘limi tomonidan o‘tkazilgan tergovga qadar tekshiruvda esa, fuqaro SH.M. “Vatanparvar” MFY hududidagi savdo do‘konini hech qanday hujjatsiz tijorat maqsadida umumiy foydalanishdagi elektr tarmog‘iga o‘g‘rilik yo‘li bilan ulab, jami 83,2 million so‘mlik elektr energiyasidan noqonuniy foydalangani aniqlangan.
Mazkur holatlar yuzasidan Jinoyat kodeksining 169-moddasi (o‘g‘rilik) va 278-moddasi (kompyuter axborotini modifikatsiyalashtirish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)