Toshkent viloyatida daryo o‘rtasida qolib ketgan, ikki nafar o‘smir yigitga amaliy yordam ko‘rsatildi, deb xabar beradi FVV matbuot xizmati.
Ma’lum qilinishicha, 6-avgust kuni soat 16:30 da Toshkent viloyati FVBga Qorasuv daryosining O‘rta Chirchiq tumani hududidan oqib o‘tuvchi qismida ikki nafar o‘smir yigit qolib ketgani va ularga yordam zarurligi haqida xabar kelib tushgan.
Xabarga asosan, zudlik bilan aytilgan manzilga FVV qutqaruvchilari yetib borgan. Aniqlanishicha, ikki nafar o‘smir yigit daryo suvining sathi pastligidan foydalanib, daryoning markaz qismida baliq ovlamoqchi bo‘lgan. Birozdan so‘ng suv sathi ko‘tarilib, oqim tezlashgani bois yigitlar qirg‘oqqa chiqa olmagan.
“Qutqaruvchilarning sa’y-harakatlari natijasida yigitlar sog‘-salomat qirg‘oqqa olib chiqilib, yaqinlariga topshirilgan”, — deyiladi xabarda.
Bir necha kun oldin Andijon viloyati Baliqchi tumanida Qoradaryoda ikki nafar bola cho‘kib ketgani to‘g‘risida xabar berilgandi. Shuningdek, Samarqandda qayiqda suratga tushmoqchi bo‘lgan to‘rt nafar yigit suv omborida cho‘kib ketgan edi.
Izoh (0)