Toshkentda yomg‘ir vaqti ko‘chani asfalt qilgan tashkilotga pul to‘lab berilmaydigan bo‘ldi

Sergeli tumani hokimligi yomg‘ir yoqqan vaqtda asfalt qilingan ko‘cha bo‘yicha ma’lumot berdi.

Ijtimoiy tarmoqlarda Sergeli tumani “Quruvchilar” mahallasi markaziy ko‘chasida yomg‘ir yog‘ib turgan paytda asfaltlash ishlari olib borilgani haqida xabarlar tarqaldi. Qayd etilishicha, ushbu voqeadan so‘ng, tuman hokimligi xodimlari tomonidan mazkur hududga chiqib, jarayon to‘xtatilgan va yomg‘ir tingandan so‘ng asfaltlashtirish ishlari qayta amalga oshirilgan.

“Mazkur holat bo‘yicha xatoga yo‘l qo‘yib, noqulay ob-havo sharoitida qilingan asfalt uchun quruvchi tashkilotga mablag‘ to‘lab berilmasligini ma’lum qilamiz”, — deyiladi xabarda.

Fevral oyida Texnik jihatdan tartibga solish agentligi vakili O‘zbekistondagi yo‘llarning sifati haqida fikr bildirib, nima sababdan ularda chuqurlar, yoriqlar, notekisliklar ko‘pligiga izoh bergandi. Ma’lumotlarga ko‘ra, O‘zbekiston hududida 98 turdagi asfalt-beton mahsulotlarini ishlab chiqaruvchi korxonalar bor. Bu korxonalarning 70 foizi standartlarga javob bermaydi.

Aprelda esa Farg‘onada asfalt xaridi bo‘yicha o‘tkazilgan salkam 3,5 milliard so‘mlik tender bekor qilingandi.