Namangan viloyati Favqulodda vaziyatlar boshqarmasi shu kunlarda viloyatdagi suv havzalariga cho‘kib ketgan fuqarolarning qidiruvi bo‘yicha ma’lumot berdi.
Qayd etilishicha, Namangan viloyati FVBga kelib tushgan xabarga asosan Norin tumanidan oqib o‘tuvchi Qoradaryoga ikki nafar — 12 va 14 yoshli voyaga yetmagan o‘g‘il bolalar cho‘kib ketgan bo‘lishi mumkin. Hozirda qidiruv-qutqaruv guruhi tomonidan suvosti hamda tuman yong‘in-qutqaruvchilar tomonidan suv usti qidiruv ishlari olib borilmoqda.
Bundan tashqari, viloyatning Uchqo‘rg‘on tumani Katta Andijon kanalida 17-iyul kunidan 30 yoshli, 23-iyul kunidan esa Pop tumani Sirdaryo daryosida 50 yoshli fuqarolarni ham suvosti va suv usti qidiruv ishlari olib borilyapti.
“Hurmatli fuqarolar yoz mavsumida sodir bo‘lishi mumkin bo‘lgan cho‘kish bilan bog‘liq baxtsiz hodisalardan farzandlaringizni ehtiyot qiling”, — deyiladi xabarda.
Iyun boshlarida Toshkent viloyatining Yangiyo‘l shahridan oqib o‘tuvchi Jo‘nariq kanalida 16 yoshli bola cho‘kib ketgandi. Uning jasadi bir kun o’tib, 4-iyunda topilgan. Farg‘ona viloyati Qo‘shtepa tumanida esa 25-may kuni Katta Farg‘ona kanaliga cho‘milishga borgan maktab bitiruvchilaridan biri suvdan qaytib chiqmagan. 9 kun davomida qidiruv ishlari natijasida uning jasadi 3-iyun kuni topilgan.
Izoh (0)