Samarqandda qayiqda ketayotganda suratga tushmoqchi bo‘lgan to‘rt nafar yigit cho‘kib ketdi. Bu haqda “Daryo”ga Bosh prokuratura axborot xizmati rahbari Hayot Shamsutdinov xabar berdi.
Ma’lum bo‘lishicha, 30-iyul kuni Qashqadaryo viloyati, Chiroqchi va Ko‘kdala tumanlarida yashovchi 7 kishi O.E., E.U., I.D., S.R., Z.O., O.A. va E.X. Nurobod tumani, “Po‘lat” mahallasida yashovchi tanishi M.M.ning tug‘ilgan kunini nishonlash uchun kelib, shu kuni soat taxminan 17:30 atrofida “Po‘lat” mahallasi hududidan o‘tgan Kattaqo‘rg‘on suv omboriga cho‘milish maqsadida borgan.
U yerda bo‘lgan qayiq bilan suv omborining qirg‘og‘idan taxminan 40 metr uzoqlikka suzib borishgan. Suratga tushmoqchi bo‘lishganida tartibsiz harakatlar qilishgani sababli muvozanatni yo‘qotib, qayiq ag‘darilib ketgan.
Natijada qayiqda bo‘lganlarning 3 nafari — Z.O., O.A. va E.X. qirg‘oqqa suzib chiqqan, qolgan to‘rt nafar yigit esa cho‘kib ketgan.
Olib borilgan qutqaruv ishlari davomida bir kishi — 21 yoshli O.E.ning murdasi topilgan.
Hozirda qidiruv-qutqaruv ishlari olib borilmoqda. Holat yuzasidan tuman prokuraturasi tomonidan tergovga qadar tekshiruv harakatlari olib borilmoqda.
Izoh (0)