Farg‘ona viloyati Quvasoy shahrida bankomatdagi pullarni talon-toroj qilgan g‘aznachi aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Quvasoy shahar bo‘limi tomonidan AT “Xalq banki” Quvasoy filialining murojaatiga asosan tergovga qadar tekshiruv o‘tkazilgan. Tekshiruvda ushbu bank filiali g‘aznachisi X.R. o‘ziga biriktirilgan bankomatni naqd pul bilan to‘ldirish hamda seyf qismidagi kassetalarni olish uchun ruxsat berilganidan foydalanib, 2023-yilning may—iyun oylarida jami 212,8 million so‘mni yaqin qarindoshi S.Sh. hamda o‘zining plastik kartasiga o‘tkazish yo‘li bilan talon-toroj qilgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Bankomatlarni o‘marish bilan bog‘liq holatlar
- Fevral boshlarida Samarqand viloyati Kattaqo‘rg‘on tumanida bir guruh yigitlar 720 million so‘m pulni olib qochgani ma’lum bo‘lgandi.
- Yanvar oyida esa Toshkent shahri Yashnobod tumanida bankomatni buzib, ichidan pul o‘g‘irlagan erkak ushlangan edi.
- Iyul oxirlarida Andijon viloyatida fuqaro I.Sh.ning AT “Xalq banki”da ishlagan davrida 3,8 milliard so‘m mablag‘ni o‘zlashtirish yo‘li bilan talon-toroj qilgani aniqlangan va qidiruvga berilgandi.
Izoh (0)