Фарғонада банк ғазначиси банкоматдаги пулларни яқин қариндоши ва ўзининг пластик картасига ўтказиб келгани маълум бўлди

Фарғона вилояти Қувасой шаҳрида банкоматдаги пулларни талон-торож қилган ғазначи аниқланди, деб хабар беради Бош прокуратура ҳузуридаги департамент.

Маълум қилинишича, департаментнинг Қувасой шаҳар бўлими томонидан АТ “Халқ банки” Қувасой филиалининг мурожаатига асосан терговга қадар текширув ўтказилган. Текширувда ушбу банк филиали ғазначиси Х.Р. ўзига бириктирилган банкоматни нақд пул билан тўлдириш ҳамда сейф қисмидаги кассеталарни олиш учун рухсат берилганидан фойдаланиб, 2023 йилнинг май—июнь ойларида жами 212,8 миллион сўмни яқин қариндоши С.Ш. ҳамда ўзининг пластик картасига ўтказиш йўли билан талон-торож қилгани аниқланган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.

Банкоматларни ўмариш билан боғлиқ ҳолатлар

• Февраль бошларида Самарқанд вилояти Каттақўрғон туманида бир гуруҳ йигитлар 720 миллион сўм пулни олиб қочгани маълум бўлганди.
• Январь ойида эса Тошкент шаҳри Яшнобод туманида банкоматни бузиб, ичидан пул ўғирлаган эркак ушланган эди.
• Июль охирларида Андижон вилоятида фуқаро I.Ш.нинг АТ “Халқ банки”да ишлаган даврида 3,8 миллиард сўм маблағни ўзлаштириш йўли билан талон-торож қилгани аниқланган ва қидирувга берилганди.