Andijon viloyati Buloqboshi tumanidagi tijorat banklarining birida faoliyat yurituvchi xodimlarning ikki nafari pensionerlarga berilishi kerak bo‘lgan pullarni talon-toroj qilib, zamonaviy qimor o‘yinlariga sarflab yuborgani aniqlandi. Bu haqda “Yoshlar” telekanalining “Yangi davr” informatsion dasturida xabar berildi.
Aniqlanishicha, pensiya va nafaqa to‘lovlari bilan ishlash sho‘basi, pensiya va nafaqa tarqatish bo‘yicha kassiri va filialning shu o‘ynalish bo‘yicha buxgalterlar nazoratchisi filial boshlig‘i tomonidan filialga qarashli bankomatlarga mas’ullik xizmati biriktirilganligidan foydalanib bankomatlarga naqd pullarni joylashtirish vaqtida maxsus muhrlarni buzib, pullarni talon-toroj qilgan.
Dastlab filial binosida joylashgan bankomatdan 4 million 200 ming so‘m pullarni olgan xodimlar ishini davom ettirib, olinayotgan pullarning miqdorini oshirishgan. Tumanning “Neftchilar” mahallasida joylashgan bankomatdan 41 million 800 ming so‘m, “Shirmonbuloq” mahallasida joylashgan bankomatdan 65 million so‘m, jami 111 million so‘m naqd pullarni qo‘lga kiritgan.
Bosh prokuratura huzuridagi departament inspektorining ma’lum qilishicha, talon-toroj qilingan ushbu pullar tergovga qadar tekshiruv harakatlari davomida to‘liq qoplangan. Mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
Izoh (0)