Andijon viloyatida fuqaro I.Sh.ning AT “Xalq banki”da ishlagan davrida 3,8 milliard so‘m mablag‘ni o‘zlashtirish yo‘li bilan talon-toroj qilganligi aniqlangan. Bu haqda Andijon viloyati Prokuraturasi “Daryo”ga maʼlum qildi.
Aytilishicha, Andijon viloyat prokuraturasi tomonidan fuqaro I.Sh. va boshqalarga nisbatan Jinoyat Kodeksining 167-moddasi 3-qismi “a” bandi (aybdorga ishonib topshirilgan yoki uning ixtiyorida bo‘lgan o‘zganing mulkini juda ko‘p miqdorda o‘zlashtirish yoki rastrata qilish yo‘li bilan talon-toroj qilish — bazaviy hisoblash miqdorining uch yuz baravaridan olti yuz baravarigacha miqdorda jarima yoki uch yilgacha axloq tuzatish ishlari yoxud besh yildan o‘n yilgacha ozodlikdan mahrum qilish bilan jazolanadi) va boshqa moddalari bilan qo‘zg‘atilgan jinoyat ishi bo‘yicha tergov harakatlari olib borilgan.
Tergovda fuqaro I.Sh. AT “Xalq banki” viloyat Kuyganyor filiali va AT “Xalq banki” viloyat amaliyot bo‘limi boshlig‘i lavozimlarida ishlab kelgan davrida 3,8 milliard so‘mlik pul mablag‘ini o‘zlashtirish yo‘li bilan talon-toroj qilganligi aniqlangan.
Fuqaro I.Sh. talon-toroj qilingan 3,8 milliard so‘m mablag‘lardan 1,3 milliard so‘mini qoplamaganligi, tergovga uzrli sabablarsiz kelmay yashirinib yurganligi sababli 2022-yilning may oyida unga nisbatan yuqoridagi moddalar bilan sirtdan ayblov eʼlon qilinib, “qamoqqa olish” tarzidagi ehtiyot chorasi tayinlangan. U qidiruvga berilgan.
Ayni vaqtda ish Jinoyat protsessual kodeksining 364-moddasi 1-qismi 2-bandiga (ayblanuvchining qayerda ekanligi noma‘lum bo‘lgan) asosan harakatdan to‘xtatilgan.
Izoh (0)