Janubiy Koreya eksport-import banki bilan hamkorlikda “Hududiy tibbiyot muassasalarini tibbiy asbob-uskunalar bilan jihozlash” loyihasini amalga oshirish chora-tadbirlari to‘g‘risidagi prezident qarori qabul qilindi.
Loyihasini amalga oshirish uchun Koreya eksport-import bankining Iqtisodiy rivojlanish va hamkorlik jamg‘armasidan O‘zbekistonga 10 yil imtiyozli davr bilan 40 yil muddatga jami 74 million dollar ekvivalentidagi Koreya vonida imtiyozli qarz ajratilishi ma’qullangan.
Loyihaning umumiy qiymati 88,78 million dollarni tashkil qiladi. Bundan:
- 74 million dollar qarz mablag‘lari;
- 14,78 million dollar soliq va bojxona to‘lovlari bo‘yicha imtiyozlar berish shaklida.
Qarz mablag‘larini qaytarish, shu jumladan, qo‘shimcha haq va foizlar, boshqa to‘lovlar bilan bog‘liq xarajatlar O‘zbekiston budjeti mablag‘lari hisobidan qoplanadi. Bunda, soliq va bojxona imtiyozlari qo‘llanishi yoki budjet mablag‘lari hisobidan to‘lab berilishi natijasida iqtisod qilingan mablag‘lar O‘zbekistonning loyihani amalga oshirishga qo‘shgan ulushi sifatida hisobga olinadi.
Sog‘liqni saqlash vazirligi huzuridagi “O‘zmedimpeks” davlat muassasasi Loyihani amalga oshirish doirasida tender komissiyasining ishchi organi va tuzilgan shartnomalar bo‘yicha kontragent hisoblanadi.
Kuni kecha Koreya Eksimbanki Iqtisodiy rivojlanish va hamkorlik jamg‘armasi hisobidan Respublika shoshilinch tibbiy yordam ilmiy markazi va uning hududiy filiallarini zarur tibbiy uskunalar bilan jihozlash uchun 17 million dollar yo‘naltirishi ma’lum bo‘lgandi.
Izoh (0)