Qashqadaryo viloyatining Mirishkor tumanida joylashgan Sechanko‘lda IIB xodimi yo‘qoldi. Bu haqda “Daryo”ga maʼlum qilgan manbaning aytishicha, xodim besh kundan beri ko‘l tagidan qidirilmoqda.
.jpg)
“Daryo” jurnalisti bilan suhbatlashgan Mirishkor tumani hokimligi axborot xizmati rahbari Azizbek Yazdurdiyevning maʼlum qilishicha, profilaktika inspektori o‘tgan yakshanba, 30-iyul kuni Sechanko‘lga dam olishga borgan.
Holat joriy yilning 30-iyulda sodir bo‘lgan. “Barhayot” MFY profilaktika inspektori J.E. yakshanba, dam olish kuni, ishdan tashqari vaqtda sheriklari bilan Pomuq hududida joylashgan Sechanko‘lga dam olish maqsadida borgani aytildi. Mirishkor tumani IIB va FVB tomonidan qidiruv ishlari tashkil etilgan bo‘lib, Favqulodda vaziyatlar boshqarmasi va tuman bo‘limining 15 nafar xodimi, maxsus texnika va g‘avvoslari, IIB xodimlari qidiruv ishlariga jalb etilgan, — deydi Azizbek Yazdurdiyev.
IIB xodimining qishloqdoshi ekanini aytgan suhbatdoshga ko‘ra, 33 yoshli IIB xodimi ko‘lga dam olish uchun 10 nafarga yaqin hamkasblari bilan birga borgan.
Voqea sodir bo‘lgan paytda o‘sha joyda bo‘lgan IIB xodimlari tergovda ekan. Biz qishloqdoshlari o‘sha kundan beri ko‘lga kelib-ketib, voqeani kuzatib turibmiz. Bugun payshanba bo‘lsa, hali ham topilmadi, — deydi suhbatdosh.
Suhbatdoshga ko‘ra, kapitan J.E.ning uch nafar farzandi bor.
Qashqadaryo viloyati IIB axborot xizmati rahbari Iroda Rasulova qidiruv ishlari davom etayotganini, voqea viloyat prokuraturasi nazoratida ekanini aytib, bundan ortiq maʼlumot berolmasligini bildirdi. Viloyat prokuraturasi esa holat haqida tez orada batafsil maʼlumot berilishini maʼlum qildi.
Izoh (0)