Yangi Mehnat kodeksida ish joylarida qo‘yiladigan talablar, yaʼni harorat bilan bog‘liq talablar ham keltirib o‘tilgan. Bu haqda huquqshunos Bahodir Ahmedov “Daryo”ga tushuntirish berdi.
Yangi Mehnat kodeksning 361-moddasida ish vaqti davomida ish o‘rinlari joylashgan xonada harorat, yorug‘lik, shuningdek, ventilyatsiya sanitariya normalari va qoidalariga mos bo‘lishi kerak.
“Issiq paytlarda ayrim xodimlarga qo‘shimcha tanaffus berilishi ham yangi kodeksimizda keltirilgan. 205-moddaga ko‘ra, yilning issiq yoki sovuq mavsumida ochiq havoda yoxud sovitilmaydigan yoki isitilmaydigan yopiq xonalarda ishlaydigan, shuningdek, yuk ortish-tushirish ishlarida band bo‘lgan shaxslar uchun maxsus tanaffuslar beriladi.
Ish beruvchi isitish, sovitish uchun asbob-uskunalar bilan jihozlangan va xodimlarning dam olishi uchun yaroqli bo‘lgan xonalarni taʼminlashi shart. Bunday tanaffuslar taqdim etiladigan ishlarning ro‘yxati, harorat ko‘rsatkichlari, shuningdek, ushbu tanaffuslarning davriyligi va davomiyligi ish o‘rinlarini mehnat sharoitlari hamda asbob-uskunalarning jarohatlash xavfi bo‘yicha attestatsiyadan o‘tkazish asosida belgilanadi”, — dedi Bahodir Ahmedov.
Huquqshunosning alohida taʼkidlashicha, yuqoridagi normalar bu munosabatlarni tartibga solish uchun kamlik qiladi.
“Aniq mexanizmlari yo‘q, ishlamaydigan normalar bo‘lib qolaveradi. Mehnat sohasida boshqa huquqiy hujjatlarga ichki lokal hujjatlar kiradi. Ish beruvchilarga qolsa bunday hujjatni qabul qilishmaydi. Shuning uchun yanada qatʼiyroq sanalgan hujjat – hukumat qarori qabul qilinishi kerak”, — dedi u.
Mavzuga doir:
- Dam olish kunlari ishga jalb qilish: choralar va haq to‘lash — huquqshunos tushuntirish berdi
- “Endilikda ayollar tug‘ruq taʼtiliga qadar tibbiy ko‘rikdan o‘tish uchun ishdan bo‘sh ish kuni olishlari mumkin” — huquqshunos (video)
- Mehnat shartnomasiga qanday shartlar kiritilsa, o‘z-o‘zidan haqiqiy hisoblanmasligi ma’lum qilindi
Izoh (0)