“Loyiha hujjatlari vazirlik bilan kelishilmagan, rad etilgan” —ekologiya vazirligi Surxondaryo va Buxoroda yo‘l qurish uchun o‘n minglab daraxtlarni ko‘chirish yuzasidan izoh berdi

Surxondaryo va Buxoro viloyatlarida yo‘l qurish belgilangan bo‘lib, rejaga muvofiq, Buxoroda 31 ming 371 tup, Surxondaryoda esa 21 ming 803 tup daraxtni ko‘chirish to‘g‘risidagi hukumat qarori loyihasiga Ekologiya vazirligi xulosa berishi topshirilgan. Ushbu holat jamoatchilik eʼtirozlariga sabab bo‘lib, tarmoqlarda keng muhokama qilinmoqda.

Yuqoridagi masala yuzasidan 27-iyul kuni Ekologiya vazirligi tomonidan AOKAda o‘tkazilgan matbuot anjumanida vazirning birinchi o‘rinbosari Obidjon Qudratov jurnalistlarga izoh berdi.

“Bu hali loyiha jarayonida. Loyiha hujjatlari vazirlik bilan kelishilmagan, rad etilgan. Yo‘l bo‘yida kesilishi mumkin bo‘lgan daraxtlarni asrab qolish bo‘yicha tegishli instansiyalarga qo‘shimcha ravishda xatlar bilan murojaat qildik.

Bundan tashqari, jamoatchilik eshituvini tashkil qilib, ular rozilik bildirgandan keyingina qaror qabul qilish to‘g‘risida Vazirlar Mahkamasi bilan kelishib olganmiz. Albatta, Surxondaryo va Buxoro viloyatlarida jamoatchilik eshituvi o‘tkaziladi.

Daraxtlarni asrab qolish bo‘yicha, birinchi navbatda, o‘zimiz o‘sha joyga borib, daraxtlarni himoya qilish choralarini ko‘ramiz”, — dedi Obidjon Qudratov.

Iqtisodchi bloger Otabek Bakirov o‘n minglab daraxtlarni ko‘chirib o‘tkazish bo‘yicha qaror loyihasiga e’tirozlarini bildirgan.

“O‘zbekistonda daraxt ko‘chirish bu daraxt kesishning chiroyli niqoblangan varianti hisoblanadi. Hamma o‘zbek chinovniklari tupurib qo‘ygan moratoriyning aylanib o‘tishning eng ko‘p tarqalgan ko‘rinishi”, — degan Otabek Bakirov o‘z postida.

Mavzuga doir:

• O‘zbekistonda daraxt kesish bilan bog‘liq 3,6 mlrd so‘mlik huquqbuzarliklar aniqlandi
• O‘zbekistonda 6 oyda daraxtlar noqonuniy kesilishidan tabiatga qancha zarar yetkazilgani ma’lum qilind
• Bosh prokuratura 2 mln ko‘chat “ekildi” deya qo‘shib yozilgani aytilgan holatni alohida nazoratga oldi