Raqobat qo‘mitasi Uzbekistan Airports aeroportga kirish hududiga kirish-chiqish uchun bitta taksi xizmatiga ruxsat berganini noqonuniy deb topdi va kompaniyadan barcha taksilarning terminalga kirishi uchun sharoit yaratish va to‘xtash joylari narxlarini qayta ko‘rib chiqishni talab qildi. Bundan norozi Uzbekistan Airports qo‘mita bilan sudlashdi.
O‘zi nima gap?
Toshkent aeroporti hududi noqonuniy taksi haydovchilaridan “tozalanib”, 2022-yil 12-sentabrdan auksion orqali g‘olib deb topilgan taksi xizmati — Taxi Airport Tashkent ish boshlagandi. Taksi xizmatini tashkil etish bo‘yicha kompaniya uch yildan ortiq bo‘lmagan benzinli avtomashinalar parkiga, shuningdek, kamida uch yillik tajribaga ega bo‘lgan haydovchilar tarkibiga ega bo‘lishi kerak edi. O‘tkazilgan elektron auksionda “Bobur Diyor” kompaniyasi g‘olib bo‘lgandi. Kompaniya aeroport yo‘lovchilarini tashish tariflarini Uzbekistan Airports bilan kelishib joriy etadi.
Raqobat qo‘mitasi yo‘lovchilar kelish terminali yonidagi maxsus yo‘lning birinchi qatoriga faqat bitta tadbirkorlik subyektiga tegishli avtomobillarning kirishiga shart-sharoit yaratib berilgani, ushbu subyektdan to‘lovlar undirilmayotgani, unga tashish uchun qat’iy belgilangan tarif qo‘llanishi va har qanday narxlar o‘zgarishi kelishilishi belgilangani, shuningdek, “texnik topshiriq” shartlari talabiga mos keluvchi litsenziyaga ega bo‘lgan taksi xizmatini ko‘rsatuvchi boshqa xo‘jalik yurituvchi subyektlarning avtomobillarini ushbu hududga kiritmayotganini raqobatning cheklanishi deb topdi.
Bundan tashqari, aeroport hududiga yaqin joylardagi avtoturargohlar uchun to‘lov miqdori oshirilganini aniqlab, to‘lov miqdorini qayta ko‘rib chiqish bo‘yicha ko‘rsatma berdi.
Uzbekistan Airports qo‘mitaning qaror va ko‘rsatmasidan norozi bo‘lib, Toshkent tumanlararo ma’muriy sudiga murojaat qildi. Sudning 2023-yil 28-martdagi hal qiluv qarori bilan Uzbekistan Airports shikoyati rad etilib, qo‘mitaning qaror va ko‘rsatmasi o‘z kuchida qoldirildi. Uzbekistan Airports appelyatsiya shikoyati asosida ish Toshkent shahar ma’muriy sudi appelyatsiya instansiyasi tomonidan ham ko‘rib chiqildi, ammo 12-iyunda shikoyatni qanoatlantirish rad etildi. Endi kompaniya Oliy sudga kassatsiya shikoyati bilan, shuningdek, taksi xizmatlari uchun yangi kompaniyalarni tanlash yo‘li bilan, qo‘mitaning buyrug‘ini bekor qilish uchun murojaat qilmoqchi.
Uzbekistan Airports munosabati
Kompaniya bayonotiga ko‘ra, Uzbekistan Airports E-auksion.uz saytida qonun hujjatlariga muvofiq — Toshkent xalqaro aeroportining uchib kelish terminalida taksi xizmati uchun joy ajratish bo‘yicha lot o‘rnatdi. Lotga bir qator majburiy hujjatlar, jumladan, texnik topshiriqlar biriktirilgan. Unga ko‘ra, taksi xizmati benzin yoki elektr quvvatida ishlaydigan transport vositalariga ega bo‘lishi lozim, sababi aeroport hududida gaz qat’iyan taqiqlangan. Shuningdek, taksi xizmati yo‘lovchilardan barcha shakllarda to‘lovlarni qabul qilishni taʼminlashi kerak. Haydovchilarga ham majburiy talablar qo‘yilgan – yagona forma, ozoda ko‘rinish, o‘zbek, rus va ingliz tillari asosini bilish.
“Bugungi kunda Toshkent shahrida yuzlab taksi kompaniyalari mavjud bo‘lib, ularda minglab turli markadagi, turli yillarda ishlab chiqarilgan, turli holatda va gazda yuradigan avtomobillar mavjud. Aeroport hududiga kirishda ularning toifalangan obyektning talablariga muvofiqligini tekshirish shunchaki imkonsiz. Shu munosabat bilan Uzbekistan Airports taksilar bilan bog‘liq vaziyatni bartaraf etish va yo‘lovchilar murojaatlarini inobatga olib, taksi xizmatlarini ko‘rsatish bo‘yicha yagona xizmatni tanlashga qaror qildi. Aks holda, aeroportda tartibni ta’minlashning iloji yo‘q edi”, — deyiladi bayonotda.
Uzbekistan Airports aksiyadorlik jamiyati boshqaruvi raisi Ra’no Jo‘rayeva aeroportda gazda yuradigan eski mashinalar qat’iyan taqiqlangani, qimmat narxlar, qo‘pol haydovchilar bo‘lishiga yo‘l qo‘yib bo‘lmasligini avval ham aytib o‘tgandi. “Biz bunday mashinalarning uchib kelish terminali zinapoyasigacha harakatlanishiga ruxsat bera olmaymiz. Bu nafaqat mamlakatning salbiy imiji, balki yo‘lovchilar xavfsizligiga tahdiddir. Muammoning yagona yechimi — rasmiy taksi xizmatiga o‘tish — bu jahon amaliyoti”, — degan edi u.
Qayd etilishicha, sud va qo‘mita Uzbekistan Airports’ning yana bir qancha taksi xizmatlarini ko‘rsatuvchi kompaniyalarni auksionga qo‘yish qarorini hisobga olmadi. Yaqin kunlarda E-auksion.uz saytida yana uchta — Toshkent xalqaro aeroportining umumiy uchish zalida, CIP uchish zalida, shuningdek, mahalliy aviaqatnovlar terminalida yana bir nuqta ochish bo‘yicha lot joylashtiriladi.
Takidlanishicha, yagona taksi xizmati faoliyat ko‘rsatgan yil davomida aeroport va ushbu faoliyat bilan shug‘ullanuvchi kompaniyaga birorta ham shikoyat kelib tushmagan, aksincha, yo‘lovchilar doim ijobiy fikr bildirmoqda.
“Bir yil oldingi holatga qaytadigan bo‘lsak: ijtimoiy tarmoqlar va turli idoralarga, prezidentning virtual qabulxonasigacha aeroportni tozalash talabi bilan doimiy murojaatlar kelib tushgan. Eski mashinalar, odobsiz haydovchilar, qimmat narxlar, shuningdek, bir necha talonchilik va yo‘lovchilarni kaltaklash holatlari — bugun Uzbekistan Airports bularning barchasini hech bo‘lmaganda o‘z hududidan siqib chiqarishga muvaffaq bo‘ldi”, — deyiladi bayonotda.
Endi yo‘lovchi rasmiy taksi xizmatlaridan foydalanishi yoki taksi agregatorlari Yandex, MyTaxi va hokazolarni eng yaqin avtoturargohga (terminaldan 50-100 metr masofada) chaqirishi mumkin, u yerda esa taksilar uchun 10 daqiqa bepul turish vaqti beriladi.
Izoh (0)