Янги Меҳнат кодексида иш жойларида қўйиладиган талаблар, яъни ҳарорат билан боғлиқ талаблар ҳам келтириб ўтилган. Бу ҳақда ҳуқуқшунос Баҳодир Аҳмедов “Дарё”га тушунтириш берди.
Янги Меҳнат кодекснинг 361-моддасида иш вақти давомида иш ўринлари жойлашган хонада ҳарорат, ёруғлик, шунингдек, вентиляция санитария нормалари ва қоидаларига мос бўлиши керак.
“Иссиқ пайтларда айрим ходимларга қўшимча танаффус берилиши ҳам янги кодексимизда келтирилган. 205-моддага кўра, йилнинг иссиқ ёки совуқ мавсумида очиқ ҳавода ёхуд совитилмайдиган ёки иситилмайдиган ёпиқ хоналарда ишлайдиган, шунингдек, юк ортиш-тушириш ишларида банд бўлган шахслар учун махсус танаффуслар берилади.
Иш берувчи иситиш, совитиш учун асбоб-ускуналар билан жиҳозланган ва ходимларнинг дам олиши учун яроқли бўлган хоналарни таъминлаши шарт. Бундай танаффуслар тақдим этиладиган ишларнинг рўйхати, ҳарорат кўрсаткичлари, шунингдек, ушбу танаффусларнинг даврийлиги ва давомийлиги иш ўринларини меҳнат шароитлари ҳамда асбоб-ускуналарнинг жароҳатлаш хавфи бўйича аттестациядан ўтказиш асосида белгиланади”, — деди Баҳодир Аҳмедов.
Ҳуқуқшуноснинг алоҳида таъкидлашича, юқоридаги нормалар бу муносабатларни тартибга солиш учун камлик қилади.
“Аниқ механизмлари йўқ, ишламайдиган нормалар бўлиб қолаверади. Меҳнат соҳасида бошқа ҳуқуқий ҳужжатларга ички локал ҳужжатлар киради. Иш берувчиларга қолса бундай ҳужжатни қабул қилишмайди. Шунинг учун янада қатъийроқ саналган ҳужжат – ҳукумат қарори қабул қилиниши керак”, — деди у.
Мавзуга доир:
- Дам олиш кунлари ишга жалб қилиш: чоралар ва ҳақ тўлаш — ҳуқуқшунос тушунтириш берди
- “Эндиликда аёллар туғруқ таътилига қадар тиббий кўрикдан ўтиш учун ишдан бўш иш куни олишлари мумкин” — ҳуқуқшунос (видео)
- Меҳнат шартномасига қандай шартлар киритилса, ўз-ўзидан ҳақиқий ҳисобланмаслиги маълум қилинди
Изоҳ (0)