Andijon viloyati Xonobod shahrida vodiyning Qirg‘iziston va Tojikiston oliygohlaridan kelgan IT sohasida iste’dodga ega bo‘lgan talabalar “Digital Valley” oromgohida o‘zaro malaka oshirmoqda. Bu haqda “Daryo” muxbiri xabar bermoqda.
Maʼlum qilinishicha, 22–26-iyul – Andijon shahrida axborot texnologiyalari yo‘nalishidagi “Digital Valley” oromgohi “Digital City” texnoparki, Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO) hamda BMTning Aholishunoslik jamg‘armasi (UNFPA) hamkorligidagi qo‘shma tashabbus bilan tashkil etilgan.
Loyiha chegaraoldi hududlarida yashovchi yoshlar va xotin-qizlar o‘rtasida transchegaraviy ijtimoiy-iqtisodiy va ekologik hamkorlikni kengaytirishga yo‘naltirilgan. Yaʼni Farg‘ona vodiysi va qo‘shni mamlakatlar yoshlari o‘rtasida axborot texnologiyalari sohasiga umumiy qiziqish asosida do‘stlik va hamkorlikni rivojlantirishdan iborat.
Ishtirokchilar raqamli texnologiyalarni qo‘llash, ularning barqaror rivojlanishga ta‘siri haqida ko‘proq ma‘lumot olishadi. IT oromgohidagi yozgi treninglar qo‘shma loyihalarni qo‘llab-quvvatlash hamda Farg‘ona vodiysining axborot-kommunikatsiya salohiyatini mustahkamlash orqali ushbu hududni yetakchi IT-markazga aylantirish uchun zamin yaratdi.
Oromgohga O‘zbekiston (Andijon, Namangan va Farg‘ona viloyatlari), Qirg‘iziston (Botkent, Jalolobod va O‘sh viloyatlari) va Tojikiston (So‘g‘d viloyati) oliygohlaridan IT sohasiga qiziqqan 60 nafar talabalar kelgan.
Barcha ishtirokchilar dasturlash, grafik dizayn va raqamli marketing ixtisosliklari bo‘yicha uch guruhga bo‘lingan. Guruhlarga biriktirilgan koordinatorlar yordamida ishtirokchilar taklif etilgan spiker va mentorlar ishtirokidagi turli ma’rifiy tadbirlarda qatnashadilar.
Besh kunlik oromgoh davomida IT sohasidagi ekspertlar va mahorat ustalarining ta’lim mashg‘ulotlari va intiltiruvchi ma’ruzalar yordamida talabalar bo‘lajak kasbni egallash uchun zarur bo‘lgan yangi bilim va ko‘nikmaga ega bo‘ladi.
Oromgohning o‘quv dasturi:
- raqamli texnologiyalarga kirish;
- ilovalar veb-ishlanmasi;
- ishlanmalar;
- raqamli marketingni qamrab olgan.
Qo‘shimcha qilinishicha, IT sohasidan taklif etilgan spikerlar biznesni ochish va barqaror rivojlanishni ilgari surish uchun raqamli texnologiyalarning imkoniyatlari haqida o‘z fikrlari bilan o‘rtoqlashdi.
Izoh (0)