Adliya vazirligi tomonidan ishlab chiqilgan “Nodavlat notijorat tashkilotlari tomonidan ijtimoiy foydali dasturlar va loyihalar amalga oshirilishida ijtimoiy sheriklik hamda xalqaro hamkorlikni yanada qo‘llab-quvvatlash chora-tadbirlari to‘g‘risida”gi qaror loyihasi jamoatchilik muhokamasiga qo‘yildi.
Adliya vazirligi axborot xizmati rahbari Sevara O‘rinboyevaning ma’lum qilishicha, loyiha nodavlat tashkilotlari tomonidan tashqi manbalardan pul mablag‘i olish hamda grant loyihalarini amalga oshirish tartibini yanada takomillashtirish va soddalashtirishni nazarda tutadi.
Unda hukumatning ikkita qarori (2019-yil 9-oktabrdagi 858-son va 2022-yil 13-iyundagi 328-son) bitta hujjatga birlashtirilmoqda.
Loyiha quyidagi talablarni bekor qilishni ko‘zda tutadi:
- nodavlat tashkilotlarining grant loyihasini amalga oshirish yuzasidan Tashqi ishlar vazirligining xulosasini olish;
- grant loyihasini amalga oshirishga biriktirilgan milliy hamkor tomonidan loyihaga o‘zgartirish va qo‘shimchalar kiritish hamda uning muddatini belgilash yuzasidan takliflar va tavsiyalar berish;
- qiymati BHMning 2 000 baravarigacha bo‘lgan grant loyihasi “yo‘l xaritasi”ni milliy hamkor bilan birgalikda tasdiqlash;
- qiymati BHMning 2 000 baravari va undan yuqori bo‘lgan grant loyihasi “yo‘l xaritasi”ni Vazirlar Mahkamasi bilan kelishish;
- grant loyihasi “yo‘l xaritasi” ijrosiga bag‘ishlangan yig‘ilishlar o‘tkazish, grant loyihasiga o‘zgartirish va qo‘shimchalar kiritish haqidagi qarorlarni Adliya vazirligi va Vazirlar Mahkamasi bilan kelishish;
- grant loyihasi “yo‘l xaritasi” ijrosi yakuni bo‘yicha umumlashtirilgan ma’lumotni Adliya vazirligi va Vazirlar Mahkamasiga kiritish;
- Adliya vazirligi tomonidan milliy hamkordan “yo‘l xaritalari”ning ijrosi bo‘yicha joriy va yakuniy ma’lumotni so‘rab olish;
- davlat va nodavlat tashkilotlari o‘rtasida imzolanadigan memorandumlar loyihalarini Adliya vazirligi va Tashqi ishlar vazirligiga ko‘rib chiqish uchun kiritish.
Bundan tashqari, loyihada pul mablag‘lari va mol-mulk olinishini kelishish talab etilmaydigan holatlar ro‘yxatini kengaytirish, davlat organlarini faqat umumiy qiymati BHMning 1 000 baravari (330 million so‘m) va undan yuqori bo‘lgan loyihalarga biriktirish, shuningdek, nodavlat tashkilotlari tomonidan xalqaro grant loyihalarini amalga oshirish yakunlari bo‘yicha loyiha natijasi to‘g‘risidagi ma’lumotlarni www.e-ngo.uz portaliga joylashtirish mustahkamlab qo‘yilmoqda.
Izoh (0)