Андижон вилояти Хонобод шаҳрида водийнинг Қирғизистон ва Тожикистон олийгоҳларидан келган IT соҳасида истеъдодга эга бўлган талабалар “Digital Valley” оромгоҳида ўзаро малака оширмоқда. Бу ҳақда “Дарё” мухбири хабар бермоқда.
Маълум қилинишича, 22–26 июль – Андижон шаҳрида ахборот технологиялари йўналишидаги “Digital Valley” оромгоҳи “Digital City” технопарки, Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (FAO) ҳамда БМТнинг Аҳолишунослик жамғармаси (UNFPA) ҳамкорлигидаги қўшма ташаббус билан ташкил этилган.
Лойиҳа чегараолди ҳудудларида яшовчи ёшлар ва хотин-қизлар ўртасида трансчегаравий ижтимоий-иқтисодий ва экологик ҳамкорликни кенгайтиришга йўналтирилган. Яъни Фарғона водийси ва қўшни мамлакатлар ёшлари ўртасида ахборот технологиялари соҳасига умумий қизиқиш асосида дўстлик ва ҳамкорликни ривожлантиришдан иборат.
Иштирокчилар рақамли технологияларни қўллаш, уларнинг барқарор ривожланишга таъсири ҳақида кўпроқ маълумот олишади. IT оромгоҳидаги ёзги тренинглар қўшма лойиҳаларни қўллаб-қувватлаш ҳамда Фарғона водийсининг ахборот-коммуникация салоҳиятини мустаҳкамлаш орқали ушбу ҳудудни етакчи IT-марказга айлантириш учун замин яратди.
Оромгоҳга Ўзбекистон (Андижон, Наманган ва Фарғона вилоятлари), Қирғизистон (Боткент, Жалолобод ва Ўш вилоятлари) ва Тожикистон (Сўғд вилояти) олийгоҳларидан IT соҳасига қизиққан 60 нафар талабалар келган.
Барча иштирокчилар дастурлаш, график дизайн ва рақамли маркетинг ихтисосликлари бўйича уч гуруҳга бўлинган. Гуруҳларга бириктирилган координаторлар ёрдамида иштирокчилар таклиф этилган спикер ва менторлар иштирокидаги турли маърифий тадбирларда қатнашадилар.
Беш кунлик оромгоҳ давомида IT соҳасидаги экспертлар ва маҳорат усталарининг таълим машғулотлари ва интилтирувчи маърузалар ёрдамида талабалар бўлажак касбни эгаллаш учун зарур бўлган янги билим ва кўникмага эга бўлади.
Оромгоҳнинг ўқув дастури:
- рақамли технологияларга кириш;
- иловалар веб-ишланмаси;
- ишланмалар;
- рақамли маркетингни қамраб олган.
Қўшимча қилинишича, IT соҳасидан таклиф этилган спикерлар бизнесни очиш ва барқарор ривожланишни илгари суриш учун рақамли технологияларнинг имкониятлари ҳақида ўз фикрлари билан ўртоқлашди.
Изоҳ (0)