Qozog‘iston Respublikasining “Xabar-24” informatsion tahliliy kanalining bergan ma’lumotiga ko‘ra Qizilo‘rda viloyatining Janako‘rg‘on tumanida 77 yoshli, Shiyeli tumanida 51 yoshli fuqarolar og‘ir holatda Qrim-Kongo gemorragik isitma (QKGI) kasalligi belgilari bilan shifoxonaga olib kelingan. Bemorlar reanimatsiya bo‘limida vafot etgan.
Manbaga ko‘ra, viloyatda yil boshidan qana chaqishi bilan 600 nafar fuqaro tibbiyot muassasalariga murojaat qilgan, shundan 23 nafari shifoxonaga yotqizilgan. Shifoxonaga yotqizilgan bemorlarning 8 nafarida QKGI kasalligi tasdiqlangan. Hozirgi kunda tabiiy o‘choqli hududlarda o‘ta xavfli yuqumli kasalliklarni keltirib chiqaruvchi bo‘g‘imoyoqlilar (kana, burga, pashsha va h.k) epidemiyasiga qarshi tadbirlar olib borilmoqda.
Ma‘lumot uchun, QKGI – arbovirus qo‘zg‘atadigan, isitmalash, gemorragik alomatlar bilan kechadigan, tabiiy sharoitda transmissiv yo‘l bilan yuqadigan, tabiiy o‘choqli o‘ta xavfli yuqumli kasallik. Kasallik odamlarga kana chaqishi oqibatida yuqadi. QKGI kasalligi sporadik tarzda tarqaladi.
Sanitariya-epidemiologik osoyishtalik va jamoat salomatligi qo‘mitasi axborot xizmatining taʼkidlashicha, Respublika hududiga karantin va o‘ta xavfli yuqumli kasalliklarni chet davlatlardan kirib kelishi va aholi o‘rtasida tarqalib ketishiga yo‘l qo‘yilmadi.
“Respublika bo‘yicha bugungi kunda, kasalliklarning chetdan kirib kelishini oldini olish maqsadida: davlat chegaralarini kesishish joylarida, xalqaro aeroportlarda, temiryo‘l vokzallarida va Termiz daryo portida tashkil etilgan 51 ta sanitariya karantin punktlari (SKP) faoliyat olib bormoqda.
O‘zbekiston Respublikasi Sanitariya-epidemiologik osoyishtalik va jamoat salomatligi qo‘mitasining tavsiyasiga ko‘ra joriy yilning aprel—may oylarida barcha ma‘muriy hududlarda epidemiyaga qarshi kurashish favqulodda komissiyasining (EQKFK) navbatdagi yig‘ilishlari o‘tkazildi. Bunda, QKGI kasalligiga qarshi amalga oshirilishi zarur bo‘lgan chora-tadbirlar muhokama etilib, sog‘liqni saqlash, Sanepidqo‘mitaning hududiy boshqarmalari va veterinariya xizmatlari hamda mutasaddi tashkilotlar bilan hamkorlikda chora-tadbirlar belgilab olindi.
QKGI qo‘zg‘atuvchilari bilan zararlangan kanalar mavjud hududlarni aniqlash va kanalarda zararlanish darajasini o‘rganish maqsadida veterinariya xizmati bilan hamkorlikda tabiiy o‘choqli hududlardan 1 000 donadan kana yig‘ib olinib, Virusologiya ITI laboratoriyasida tahlildan o‘tkazilib, QKGI kasalligining kelgusi yil uchun bashorati, ma‘muriy hududlar kesimida tayyorlandi.
Qoraqalpog‘iston Respublikasi, Navoiy, Buxoro, Qashqadaryo, Surxondaryo, Jizzax va Sirdaryo viloyatlaridagi tegishli muassasalarda Qrim-Kongo gemorragik isitmasi bilan kasallanib tuzalganlarning (donorlarning) 14 litr qon plazmasi zaxirasi yaratildi. Bu esa Qrim-Kongo gemorragik isitma kasalligi aniqlanganda, kasallikning og‘ir asoratlarini oldini olishga zamin yaratadi”, – deyiladi qo‘mita axborotida.
Qo‘shimcha qilinishicha, QKGI kasalligi bo‘yicha tabiiy o‘choqli hududlar aholisi o‘rtasida QKGI kasalligining oldini olish bo‘yicha keng qamrovli sanitariya-targ‘ibot ishlari olib borilmoqda. Xususan, mart oyida O‘zbekiston Respublikasi Favqulodda vaziyatlar vazirligi bilan hamkorlikda 14 ta ma‘muriy hududda maxsus–taktik o‘quv mashg‘ulotlari o‘tkazildi.
Izoh (0)