Qashqadaryo viloyatidagi mavjud pensiya va nafaqa oluvchilarga bir oyda o‘rtacha 430 milliard so‘m mablag‘ to‘lab berilmoqda. Bu ko‘rsatkich joriy yilning olti oyida 2,5 trillion so‘mni tashkil qilgan. Bu haqda “Daryo”ga budjetdan tashqari Pensiya jamg‘armasi Qashqadaryo viloyati boshqarmasi boshlig‘i Alisher Rajabov maʼlum qildi.
Masʼulning maʼlumot berishicha, viloyatda yashovchi 411 ming 20 nafar fuqaroga boshqarma va uning tuman, shahar bo‘limlari tomonidan pensiya va nafaqa to‘lanadi.
Viloyat bo‘yicha pensiya oluvchilar 340 ming 529 nafar bo‘lsa, nafaqa oluvchilar 70 ming 491 nafar kishini tashkil qilmoqda.
2023-yilning 1-iyul holatiga ko‘ra, yoshga doir pensiya oluvchilar 279 ming 211 nafarni, nogironlik pensiyasini oluvchilar 38 ming 321 nafarni, boquvchisini yo‘qotganlik pensiyasini oluvchilar 22 ming 987 nafarni tashkil etadi, — deydi Alisher Rajabov.
Qo‘shimcha qilinishicha, viloyatda pensiya yoshiga yetgan erkaklar va ayollar 200 724 nafarga yetgan bo‘lsa, bolalikdan nogironligi bo‘lgan farzandli onalar 18 582 nafarni tashkil qilmoqda. Ish staji yo‘q 1-, 2-guruh nogironligi bor shaxslar 12 738 nafarni ko‘rsatayotgan bo‘lsa, boquvchisini yo‘qotgan oilalar 28 271 nafarga, 18 yoshdan katta 1-, 2-guruh bolalikdan nogironligi bor shaxslar 18 686 nafarga, 18 yoshgacha nogironligi bor bolalar 18 582 nafarga, 18 yoshgacha nogironligi bor farzandni parvarish qilayotgan ota (ona) esa 9 486 nafarni tashkil qilmoqda.
Izoh (0)