Yozning jazirama kunlarida quyosh nurlari anchayin issiq va tik tushadi. Bunday vaqtlarda ko‘zni asrash va uni to‘g‘ri himoyalash muhim. Ko‘p yillik tajribaga ega oftalmolog Hikmatullo Sodiqov “Daryo” muxbiriga bergan intervyusida issiqda ko‘zni asrash bo‘yicha o‘z tavsiyalarini berdi.
Oftalmologning aytishicha, yoz oylarida boshqa vaqtga nisbatan ko‘zda o‘ziga xos muammolar kuzatiladi.
“Masalan, ko‘z qurishi sindromidan tortib ko‘zdagi bosim oshish, katarakta, et o‘sishi va xiralashish, tez yoshlanish kabi holatlar kuzatilishi mumkin. Buning olidini olish uchun ko‘z sog‘lom bo‘lsa, himoya ko‘zoynaklaridan foydalanish tavsiya etiladi. Agarda ko‘zda minus, plyus yoki astegmatizm bo‘lsa, to‘rt qatlamli ko‘zoynaklardan foydalanish lozim”, — dedi Hikmatullo Sodiqov.
Shifokorning tavsiya berishicha, ko‘zi sog‘lom inson nurga qarab tusi o‘zgaruvchi ko‘zoynaklardan taqib yurishi mumkin. Ko‘z xiraligi uchun buyurilgan ko‘zoynaklardan ham tusi o‘zgaruvchan qoplamli ko‘zoynaklarga moslashtirib foydalanish mumkin.
“Ko‘zni quyosh nuridan to‘g‘ri himoyalash ko‘zning himoya qavatini yaxshilashga yordam beradi. Shuningdek, ko‘z namligini yaxshi ushlaydigan ko‘z tomchilari bor, uni shifokor retseptisiz olib, ishlatsa bo‘ladi. U ham ko‘z pardasi namligini oshirib, turli noxushliklardan asrashga yordam beradi. Quyoshda himoya ko‘zoynaklarisiz ko‘p yurish ko‘zning sarg‘ayib ketishiga olib kelishi mumkin. Shuningdek, ko‘zning sklera (oqsil) qavati ustida yog‘ paydo bo‘lishi va baʼzilarda esa go‘sht o‘sishi mumkin”, — dedi oftalmolog.
Mavzuga doir:
Izoh (0)