Қашқадарё вилоятидаги мавжуд пенсия ва нафақа олувчиларга бир ойда ўртача 430 миллиард сўм маблағ тўлаб берилмоқда. Бу кўрсаткич жорий йилнинг олти ойида 2,5 триллион сўмни ташкил қилган. Бу ҳақда “Дарё”га бюджетдан ташқари Пенсия жамғармаси Қашқадарё вилояти бошқармаси бошлиғи Алишер Ражабов маълум қилди.
Масъулнинг маълумот беришича, вилоятда яшовчи 411 минг 20 нафар фуқарога бошқарма ва унинг туман, шаҳар бўлимлари томонидан пенсия ва нафақа тўланади.
Вилоят бўйича пенсия олувчилар 340 минг 529 нафар бўлса, нафақа олувчилар 70 минг 491 нафар кишини ташкил қилмоқда.
2023 йилнинг 1 июль ҳолатига кўра, ёшга доир пенсия олувчилар 279 минг 211 нафарни, ногиронлик пенсиясини олувчилар 38 минг 321 нафарни, боқувчисини йўқотганлик пенсиясини олувчилар 22 минг 987 нафарни ташкил этади, — дейди Алишер Ражабов.
Қўшимча қилинишича, вилоятда пенсия ёшига етган эркаклар ва аёллар 200 724 нафарга етган бўлса, болаликдан ногиронлиги бўлган фарзандли оналар 18 582 нафарни ташкил қилмоқда. Иш стажи йўқ 1-, 2-гуруҳ ногиронлиги бор шахслар 12 738 нафарни кўрсатаётган бўлса, боқувчисини йўқотган оилалар 28 271 нафарга, 18 ёшдан катта 1-, 2-гуруҳ болаликдан ногиронлиги бор шахслар 18 686 нафарга, 18 ёшгача ногиронлиги бор болалар 18 582 нафарга, 18 ёшгача ногиронлиги бор фарзандни парвариш қилаётган ота (она) эса 9 486 нафарни ташкил қилмоқда.
Изоҳ (0)