O‘zbekiston avtomobil bozorida iyun oyida pasayish kuzatildi. Bu haqda Iqtisodiy tadqiqotlar va islohotlar markazi tomonidan o‘tkazilgan o‘rganishlarda ma’lum bo‘ldi.
Unga ko‘ra, 2023-yilning 1-yarim yilligi yakunlariga ko‘ra, avtomobillar savdosi 2-chorakdagi 14 foiz o‘sishga nisbatan yillik o‘sish 11 foizga yetib, 718,2 mingta avtomobilni tashkil etdi va savdolar 372 mingtadan oshdi. Umuman olganda, iyun oyida sotilgan avtomobillar soni 123 mingtani tashkil etib, may oyiga nisbatan 21 foizga sezilarli pasayish va o‘tgan yilning iyun oyiga nisbatan 2,6 foizga o‘sish kuzatildi.
Yozning birinchi oyida O‘zbekistonda 110,5 ming dona yengil avtomobillar sotilgan bo‘lib, bir oy davomida 21,6 foizga kamaygan. Yengil avtomobillar savdosining eng katta pasayishi Sirdaryo – 36 foiz, Buxoro – 34 foiz viloyatlarida va Toshkent shahrida – 34 foiz qayd etildi. Shu bilan birga, o‘tgan yilning shu davriga nisbatan sotuvlar 0,9 foizga oshdi.
Birlamchi avtomobil bozoridagi vaziyat
Oy davomida birlamchi bozorda yengil avtomobillar savdosi 17,5 foizga kamaydi. Shu bilan birga, 2022-yil iyun oyiga nisbatan birlamchi bozorda 8,4 foiz o‘sish qayd etildi. Yangi mahalliy yengil avtomobillar savdosi deyarli 24 mingni tashkil etdi va may oyiga nisbatan 20 foizga kamaydi.
Yengil avtomobillar bozori
Xorijda ishlab chiqarilgan yangi yengil avtomobillar savdosi 3,7 mingtani tashkil etib, 14 foizga o‘sdi.
Ikkilamchi avtomobil bozoridagi vaziyat
Iyun oyida yengil avtomobillarning ikkilamchi avtomobil bozori ham sotuvlarning pasayishi bilan ajralib turdi. Oy davomida deyarli 83 mingta yengil avtomobillar sotilgan, bu may oyiga nisbatan 23 foizga kam.
Elektromobillar bozori
2023-yilning birinchi yarmida elektromobillar savdosi 7,6 mingtani tashkil etib, yillik o‘sishi 1,7 baravar ko‘paydi. Shu bilan birga, 2-chorakda 5,4 ming dona elektromobil sotilgan bo‘lib, bu o‘tgan yilga nisbatan 2 baravar ko‘p.
Iyun oyida yengil elektromobillar savdosi 8,7 foizga o‘sdi va 2,1 mingtani tashkil etdi. Toshkent shahri elektromobillar savdosi bo‘yicha yetakchiligicha qolmoqda — 1,6 mingta. Toshkent va Farg‘ona viloyatlarida mos ravishda 105 dona va 102 dona sotilgan.
Elektromobillarning birlamchi bozori bir oy davomida 14 foizga o‘sdi. Ikkilamchi bozorda sotuvlar iyun oyida 8,5 foizga kamaydi.
Izoh (0)