Britaniyalik talabalar O‘zbekistonda qisqa muddatli akademik almashinuv dasturlari orqali taʼlim oladi. Bu haqda Oliy ta’lim, fan va innovatsiyalar vazirligi axborot xizmati xabar berdi.
Unga ko‘ra, 8-iyul kuni oliy ta’lim, fan va innovatsiyalar vaziri Ibrohim Abdurahmonov Britaniya oliy ta’lim sifatini ta’minlash agentligi rahbari Eduardo Ramosni qabul qildi. Unda tomonlar oliy ta’lim yo‘nalishidagi hamkorlik masalalarini muhokama qildi. Ibrohim Abdurahmonov O‘zbekistonda oliy taʼlim, fan va innovatsiyalar sohasida oxirgi yillarda olib borilgan ishlar bo‘yicha maʼlumot berdi. Eduardo Ramos o‘z o‘rnida Britaniya universitetlarining O‘zbekiston bilan hamkorlikka qiziqishi ortib borayotganini aytib o‘tdi.
Shuningdek, Britaniya Oliy ta’lim sifatini ta’minlash agentligi rahbari ayni kunlarda Britaniyada O‘zbekiston oliy taʼlim tizimi haqida report (hisobot) ishlab chiqilayotgani va unda vazir Ibrohim Abdurahmonovning fikr va xulosalari inobatga olish imkoniyati mavjudligini ko‘rsatib o‘tdi.
E.Ramos britaniyalik talabalarning O‘zbekistonda qisqa muddatli akademik almashinuv dasturlari orqali taʼlim olishlarini qo‘llab-quvvatlashini qayd etdi. Bunda taʼlim davri 6 oydan 1 yilgacha tashkil qilishi, bu vaqt davomida talabalar O‘zbekiston tarixi va o‘zbek tili yo‘nalishlari bo‘yicha tahsil olishi ko‘zda tutilayotgani taʼkidlandi.
Izoh (0)