Jinoyat ishlari bo‘yicha Namangan tuman sudida 4 tup qimmatbaho sadaqayrag‘och daraxtini kesgan shaxsga hukm o‘qildi, deb xabar beradi Ekologiya, atrof-muhitni muhofaza qilish va iqlim o‘zgarishi vazirligi.
Qayd etilishicha, 2-mart kuni Namangan tuman Ekologiya bo‘limi inspektorlari, IIB hamda Milliy gvardiya xodimlari bilan hamkorlikda “O‘lmas” MFY hududida profilaktik qo‘shma reyd o‘tkazilgan. Reyd davomida fuqaro B.M. tomonidan yoshi 100 yildan kam bo‘lgan to‘rt tup qimmatbaho sadaqayrag‘och daraxti kesib yuborilgani va bu orqali o‘simlik dunyosiga 326 million 850 ming so‘m miqdorida zarar yetkazilgani aniqlangan.
Fuqaro B.M.ning harakatlarida jinoyat alomatlari borligi sababli ish hujjatlariga huquqiy baho berish uchun tuman prokuraturasiga yuborilgan. Tuman prokuraturasi tomonidan ish hujjatlari o‘rganilib, ayblanuvchiga nisbatan Jinoyat kodeksining 198-moddasining (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) 2-qismi bilan jinoyat ishi qo‘zg‘atilgan va jinoyat ishini mazmunan ko‘rib chiqish uchun Jinoyat ishlari bo‘yicha Namangan tuman sudiga yuborilgan.
Sayyor sud majlisida ko‘rib chiqilgan ish davomida B.M. aybdor deb topilib, unga nisbatan 2 yil muddatga ozodlikni cheklash jazosi tayinlangan. Shuningdek, B.M.dan Namangan viloyat Ekologiya boshqarmasi foydasiga o‘simlik dunyosiga yetkazilgan 326 million 850 million so‘m zararni undirish belgilangan.
Noqonuniy daraxt kesish holatlari
Bir necha kun oldin Farg‘onadagi chegara posti yaqinida 12 tup manzarali daraxt qo‘porib tashlangani to‘g‘risida xabar berilgandi. O‘zbekistonda 2022-yil davomida daraxt va butalarning noqonuniy kesilishi ortidan tabiatga 10 milliard so‘m zarar yetkazilgan. O‘tgan yilda jami 1 777 tup qimmatbaho va ko‘p yillik daraxtlar kesilgan. Vaziyat tahlil etilganda, qurilish obyektlari atrofini o‘rab olish natijasida daraxtlarning qarovsiz qolishi, shikastlanishi va nobud bo‘lish holatlari sodir etilayotgani aniqlangan.
Izoh (0)