Жиноят ишлари бўйича Наманган туман судида 4 туп қимматбаҳо садақайрағоч дарахтини кесган шахсга ҳукм ўқилди, деб хабар беради Экология, атроф-муҳитни муҳофаза қилиш ва иқлим ўзгариши вазирлиги.
Қайд этилишича, 2 март куни Наманган туман Экология бўлими инспекторлари, ИИБ ҳамда Миллий гвардия ходимлари билан ҳамкорликда “Ўлмас” МФЙ ҳудудида профилактик қўшма рейд ўтказилган. Рейд давомида фуқаро Б.М. томонидан ёши 100 йилдан кам бўлган тўрт туп қимматбаҳо садақайрағоч дарахти кесиб юборилгани ва бу орқали ўсимлик дунёсига 326 миллион 850 минг сўм миқдорида зарар етказилгани аниқланган.
Фуқаро Б.М.нинг ҳаракатларида жиноят аломатлари борлиги сабабли иш ҳужжатларига ҳуқуқий баҳо бериш учун туман прокуратурасига юборилган. Туман прокуратураси томонидан иш ҳужжатлари ўрганилиб, айбланувчига нисбатан Жиноят кодексининг 198-моддасининг (Экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) 2-қисми билан жиноят иши қўзғатилган ва жиноят ишини мазмунан кўриб чиқиш учун Жиноят ишлари бўйича Наманган туман судига юборилган.
Сайёр суд мажлисида кўриб чиқилган иш давомида Б.М. айбдор деб топилиб, унга нисбатан 2 йил муддатга озодликни чеклаш жазоси тайинланган. Шунингдек, Б.М.дан Наманган вилоят Экология бошқармаси фойдасига ўсимлик дунёсига етказилган 326 миллион 850 миллион сўм зарарни ундириш белгиланган.
Ноқонуний дарахт кесиш ҳолатлари
Бир неча кун олдин Фарғонадаги чегара пости яқинида 12 туп манзарали дарахт қўпориб ташлангани тўғрисида хабар берилганди. Ўзбекистонда 2022 йил давомида дарахт ва буталарнинг ноқонуний кесилиши ортидан табиатга 10 миллиард сўм зарар етказилган. Ўтган йилда жами 1 777 туп қимматбаҳо ва кўп йиллик дарахтлар кесилган. Вазият таҳлил этилганда, қурилиш объектлари атрофини ўраб олиш натижасида дарахтларнинг қаровсиз қолиши, шикастланиши ва нобуд бўлиш ҳолатлари содир этилаётгани аниқланган.
Изоҳ (0)