O‘zbekiston Milliy gvardiyasi “Milliy gvardiyasi Qo‘riqlash bosh boshqarmasining qo‘riqlash-patrul xizmatini tashkil etish to‘g‘risida”gi hukumat qarori loyihasini muhokamaga qo‘ydi.
Qayd etilishicha, ushbu xizmat yuzaga kelayotgan kriminogen va ijtimoiy vaziyatga tezkor taʼsir ko‘rsatish, mahalliy davlat hokimiyati organlarining jamoat xavfsizligini taʼminlash, huquqbuzarliklarning oldini olish va jinoyatchilikka qarshi kurashish sohasidagi faoliyatiga qo‘shimcha kuch va vositalarni jalb etish borasidagi huquq va imkoniyatlarini kengaytirish maqsadida tashkil etilmoqda.
Milliy gvardiya Qo‘riqlash bosh boshqarmasining qo‘riqlash-patrul xizmati davlat va xo‘jalik boshqaruvi organlari, mahalliy davlat hokimiyati organlari hamda boshqa tashkilotlar, tadbirkorlik subyektlari, shuningdek, jismoniy va yuridik shaxslar bilan ixtiyoriy ravishda tuzilgan shartnomalarga asosan belgilangan hududlarda tashkil etiladi.
Milliy gvardiya manfaatdor vazirliklar va idoralar bilan birgalikda:
- Qo‘riqlash bosh boshqarmasining qo‘riqlash-patrul xizmati tomonidan ko‘rsatilayotgan xizmatlarning tariflarini ishlab chiqadi va tasdiqlatadi;
- o‘zlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtiradi.
Qo‘riqlash-patrul xizmatini tashkil etish to‘g‘risidagi nizomga ko‘ra, Milliy gvardiya Qo‘riqlash bosh boshqarmasining qo‘riqlash-patrul xizmati faoliyatini tashkil etish, naryadlar xizmatini tashkillashtirish va ularning asosiy vazifalari, funksiyalari, huquqlari, majburiyatlari hamda javobgarligini tartibga soladi.
Milliy gvardiyaga berilayotgan vakolatlar
2021-yilning avgustida O‘zbekiston Milliy gvardiyasi xodimlariga fuqarolarning avtomobillaridan majburiy tarzda foydalanishga ruxsat berilgan edi. Milliy gvardiya organlari tomonidan transport vositasidan majburiy tarzda foydalanilganda, transport vositasining egasiga harbiy xizmatchi (xodim) o‘z identifikatsiyalovchi hujjatini berishi shart.
Shu yilning mayida esa prezident tomonidan imzolangan qonun bilan Maʼmuriy javobgarlik to‘g‘risidagi kodeksga o‘zgartirishlar kiritildi. Hujjat bilan Milliy gvardiya organlari xodimlariga mayda bezorilik, sovuq qurol yoki sovuq qurol sifatida foydalanilishi mumkin bo‘lgan ashyolarni olib yurish, voyaga yetmagan shaxsni maʼmuriy huquqbuzarlik sodir etishga, g‘ayriijtimoiy xatti-harakatlarga jalb qilish, jamoat joylarida alkogol mahsulotlarini isteʼmol qilish kabi maʼmuriy huquqbuzarliklar bo‘yicha ishlarni ko‘rib chiqish, bayonnomalar tuzish va ularni ko‘rib chiqish uchun sudga yuborish bo‘yicha qo‘shimcha vakolatlar berilgan.
Izoh (0)