Farg‘onadagi chegara posti yaqinida 12 tup manzarali daraxt qo‘porib tashlandi
Farg‘ona viloyat Tabiat resurslari boshqarmasi “Andarxon” chegara posti yonida daraxtlar qo‘porib tashlangani aytilgan xabarlarga munosabat bildirdi.
Bloger Nikita Makarenko 21-may kuni Telegram’dagi kanaliga “Andarxon” chegara posti yonidagi daraxtlar qo‘porib tashlangani tasvirlangan videoni joyladi. Yuqoridagi holat Farg‘ona viloyati Tabiat resurslari boshqarmasi davlat inspektorlari tomonidan o‘rganilgan.
O‘rganish davomida Beshariq tumani “Andarxon” chegara posti yonida manzarali 3 tup tol hamda 9 tup archa daraxtlari nomaʼlum shaxslar tomonidan noqonuniy ravishda ildiz qismidan qo‘porib olib tashlangani va o‘simlik dunyosiga 99 575 500 so‘m miqdorida zarar yetkazilgani aniqlangan.
Hozirda huquqbuzarlar shaxsiga oydinlik kiritish va huquqiy baho berish uchun to‘plangan hujjatlar viloyat prokuraturasiga taqdim etilgan.
Noqonuniy daraxt kesish holatlari
O‘zbekistonda 2022-yil davomida daraxt va butalarning noqonuniy kesilishi ortidan tabiatga 10 milliard so‘m zarar yetkazilgan. O‘tgan yilda jami 1 777 tup qimmatbaho va ko‘p yillik daraxtlar kesilgan. Vaziyat tahlil etilganda, qurilish obyektlari atrofini o‘rab olish natijasida daraxtlarning qarovsiz qolishi, shikastlanishi va nobud bo‘lish holatlari sodir etilayotgani aniqlangan.
