Buyuk Britaniyaning sobiq bosh vaziri Liz Trassga joriy yilning may oyida Tayvanga to‘rt kunlik safari va orol rahbariyati bilan uchrashuvi uchun 3,58 million Tayvan dollari (115 ming AQSH dollari) to‘langan. Bu haqida Taiwan News xabar qildi.
Trass Tayvanga mamlakat Tashqi ishlar vazirligining taklifiga binoan kelgan, biroq u ushbu mablag‘ning katta qismini, ya’ni 3,16 million Tayvan dollarini (101 ming AQSH dollari) Prospect Foundation fondidan olgan. Trass mazkur fond tomonidan tashkil qilingan tadbirda nutq so‘zlagandi.
Yana 395 000 Tayvan dollari (taxminan, 13 000 AQSH dollari) Tayvan Tashqi ishlar vazirligi tomonidan turli xarajatlarni qoplash uchun to‘langan.
Sobiq bosh vazir 17-21 may kunlari orolda bo‘lgan. Safar davomida u G‘arb Xitoy bilan yangi sovuq urushga kirganini aytgandi. Uning fikricha, Pekin o‘z harbiy-dengiz flotini xavotirli sur’atda kuchaytirmoqda va tinchlik davridagi eng katta harbiy quvvatni oshirishga intilmoqda.
Trass xonim Buyuk Britaniya bosh vaziri lavozimiga 2022-yilning 5-sentabrida saylandi. Ammo oradan 50 kun o‘tib iste'foga chiqishga majbur bo‘ldi. Holatga uning iqtisodiyot sohasidagi keskin islohotlarga boy rejasi jamoatchilik tomonidan salbiy kutib olingani asosiy sabab bo‘ldi.
Izoh (0)