Буюк Британиянинг собиқ бош вазири Лиз Трассга жорий йилнинг май ойида Тайванга тўрт кунлик сафари ва орол раҳбарияти билан учрашуви учун 3,58 миллион Тайван доллари (115 минг АҚШ доллари) тўланган. Бу ҳақида Taiwan News хабар қилди.
Трасс Тайванга мамлакат Ташқи ишлар вазирлигининг таклифига биноан келган, бироқ у ушбу маблағнинг катта қисмини, яъни 3,16 миллион Тайван долларини (101 минг АҚШ доллари) Prospect Foundation фондидан олган. Трасс мазкур фонд томонидан ташкил қилинган тадбирда нутқ сўзлаганди.
Яна 395 000 Тайван доллари (тахминан, 13 000 АҚШ доллари) Тайван Ташқи ишлар вазирлиги томонидан турли харажатларни қоплаш учун тўланган.
Собиқ бош вазир 17-21 май кунлари оролда бўлган. Сафар давомида у Ғарб Хитой билан янги совуқ урушга кирганини айтганди. Унинг фикрича, Пекин ўз ҳарбий-денгиз флотини хавотирли суръатда кучайтирмоқда ва тинчлик давридаги энг катта ҳарбий қувватни оширишга интилмоқда.
Трасс хоним Буюк Британия бош вазири лавозимига 2022 йилнинг 5 сентябрида сайланди. Аммо орадан 50 кун ўтиб истеъфога чиқишга мажбур бўлди. Ҳолатга унинг иқтисодиёт соҳасидаги кескин ислоҳотларга бой режаси жамоатчилик томонидан салбий кутиб олингани асосий сабаб бўлди.
Изоҳ (0)