Yevropa komissari Didye Reynders Yevropa Ittifoqi Rossiyaning muzlatilgan aktivlaridan tushgan mablag‘dan Ukrainani tiklash uchun foydalanish imkoniyatini muhokama qilishda davom etayotganini aytdi. Reyndersga ko‘ra, Yevropada bloklangan Rossiya aktivlari miqdori 207 milliard yevroni tashkil qiladi.
“Yevropa komissiyasi Rossiyaning Yevropada muzlatib qo‘yilgan 207 milliard yevro miqdoridagi aktivlari, jumladan, Rossiya Federatsiyasi Markaziy banki aktivlaridan Ukrainani tiklashni moliyalashtirish uchun foydalanish imkoniyatini muhokama qilmoqda”, — dedi u.
Bu haqda Reynders Gaagadagi matbuot anjumanida aytib o‘tdi. Unga ko‘ra, Yevrokomissiya shu yo‘l bilan har yili 3 milliard yevrogacha mablag‘ olishni kutmoqda.
2022-yil oktabr oyidan boshlab Yevropa Ittifoqi Kengashining yuridik xizmati Ukrainani tiklash uchun Rossiya bankining bloklangan aktivlaridan foydalanish imkonini beruvchi mexanizmni ishlab chiqmoqda. Belgiya bosh vaziri Aleksandr de Kruning so‘zlariga ko‘ra, Rossiyaning Yevropada muzlatilgan aktivlarining 90 foizi uning mamlakatida saqlanadi, chunki Euroclear depozitariysi Belgiyada joylashgan.
Izoh (0)