Xitoyda 56 yoshli millioner Lyang Shi universitetga kirish uchun 27-marta imtihon topshirdi va yana muvaffaqiyatsizlikka uchradi. Bu haqda CNN xabar berdi.
Erkak 40 yil davomida Xitoy universitetiga kirish imtihonidan o‘tishga harakat qilmoqda. U butun umri davomida ziyoli sifatida tan olinishi uchun nufuzli Sichuan universitetida diplom olishni orzu qilgan. Shi 1983-yilda birinchi “gaokao”dan (Xitoy davlat universitetiga kirish imtihonidan) o‘ta olmadi.
Birinchi muvaffaqiyatsiz tajribadan so‘ng, bo‘lajak millioner bir yildan keyin yana urinib ko‘rishga qaror qildi, ammo bu ham ish bermadi va texnik maktabga o‘qishga kirdi. Biroq, u tez orada o‘qishdan ketishga majbur bo‘ldi.
Shi ko‘p yillar davomida kam maoshli lavozimlarda ishlagan, fabrikalarda oddiy ishchi bo‘lgan va vaqti-vaqti bilan imtihondan o‘tishga harakat qilgan. 1992-yil u universitetlardan biriga kirish uchun yetarli ball to‘pladi va o‘qishga kirdi, lekin bu u xohlagan universitet emas edi va u ta’limdan bosh tortdi.
Ko‘p o‘tmay, erkak “gaokao”da ishtirok etish uchun yosh chegarasidan oshib ketdi, ammo 2001-yilda Xitoy hukumati bu cheklovni bekor qildi va Shi o‘z urinishlarini davom ettirishga qaror qildi. 2010-yildan boshlab u har yili imtihon topshirdi.
Shu yillar davomida Shi o‘z biznesini, qurilish materiallari zavodini ochishga muvaffaq bo‘ldi. U o‘z korxonasidan millionlab yuan ishlab topdi, lekin u hali ham universitetda oliy ma’lumotsiz to‘liq baxtga erisha olmasligiga ishonadi.
So‘nggi yillarda “gaokao” imtihoniga tayyorgarlik ko‘rish uchun u butun vaqtini o‘qishga bag‘ishlab, spirtli ichimliklar va o‘yin-kulgilardan butunlay voz kechdi. Har kuni ertalab o‘qish uchun choyxonaga borar, ishdan keyin esa o‘qishni davom ettirish uchun qolardi.
Har qancha urinmasin, Shi 2023-yil muvaffaqiyatga erisha olmadi va o‘tgan safargidan 34 ball kam to‘pladi.
Izoh (0)