Shveysariya Ukrainadagi 30 ta maktabni rekonstruksiya qilish uchun 5,5 million Shveysariya franki (6,1 million dollar) ajratishga qaror qildi. Bu haqda hukumat saytidagi bayonotda ma’lum qilindi.
Ma’lum qilinishicha, mablag‘lar Chernigov, Odessa va Poltavadagi jangovar harakatlardan bevosita zarar ko‘rgan 30 ta maktabni tiklash, u yerda uzluksiz o‘qishni ta’minlashga yo‘naltiriladi.
“Yordamning maqsadi 15 000 ga yaqin maktab o‘quvchilarining munosib va xavfsiz ta’lim olishlarini ta’minlashdan iborat”, — deyiladi bayonotda.
Avvalroq Shveysariya tashqi ishlar vaziri Inyatsio Kassis Ukrainaga besh yil ichida 1,7 milliard dollar miqdorida moliyaviy yordam berilishini ma’lum qilgandi. Uning qo‘shimcha qilishicha, Shveysariya 2023 va 2024-yillarda Kiyevga 331 million dollar qo‘shimcha pul yo‘naltirish majburiyatini olgan.
Izoh (0)