Farg‘ona viloyati Uchko‘prik tumanida qurilishi tugallanmagan sexda yong‘in sodir bo‘ldi.
FVV matbuot xizmatining xabar qilishicha, 19-iyun kuni soat 12:42 da qurilishi tugallanmagan kalava ip va rangli ip ishlab chiqarish sexida sodir bo‘layotgani to‘g‘risida xabar tushgan.
Shunga ko‘ra 4 ta yong‘in-qutqaruv ekipaji soat 12:45 da voqea joyiga yetib borib, yong‘in soat 12:48 da o‘rab olingan va soat 13:02 da o‘chirilgan.
Yong‘in natijasida sex binosining 150 kvadrat metr maydonida tom qismi, operator va qorovul xonasining ichki qismi yonib zararlangan. Yong‘indan binoning 2 000 kvadrat metr maydoni saqlab qolingan.
Hodisa oqibatida tan jarohati olgan va halok bo‘lganlar yo‘q. Yong‘in sababi va zarar miqdori aniqlanmoqda.
Bundan bir necha kun avval Farg‘ona viloyatining Qo‘qon shahridagi savdo kompleksida yong‘in sodir bo‘lgandi. Ushbu yirik yong‘in 10 ta yong‘in-qutqaruv ekipaji yordamida bartaraf etilgan. Holat yuzasidan jinoyat ishi qo‘zg‘atilgan. Viloyat hokimligi yonib ketgan do‘konlar 15 kunda qayta qurib berilishini ma’lum qildi. Qurilish ishlari uchun tadbirkorlardan umuman pul olinmaydi. Barcha ishlar bozor ma‘muriyati hisobidan amalga oshiriladi.
Izoh (0)