Samarqand viloyati hokimi Erkinjon Turdimov viloyatda faoliyat yurituvchi tuman va shahar hokimlarini, qolaversa tashkilot rahbarlarini ogohlantirib, fuqaro murojaatiga doir birorta muammo yechilmasa, o‘sha soha rahbari ishdan olinishini bildirdi. Bu haqda viloyat hokimi 2023-yilning 16–17-iyun kunlari Payariq tumanida bo‘lib o‘tgan sayyor qabulida maʼlum qilgan.
“Hamma tuman rahbarlari, viloyat rahbarlari qulog‘ingizga quyib oling, fuqarolardan kimdir 16–17-iyun kuni qabulda bo‘lgandim, bo‘lmadi deb kelsa, unda o‘sha kim bo‘lishidan qatʼi nazar ikki qo‘lim o‘sha rahbar yoqasida bo‘ladi. Qanday qabul qilsang, shunday qabul qil, meni qiziqtirmaydi seni qanday o‘ylashing”, — deydi viloyat hokimi Erkinjon Turdimov.
Samarqand viloyati hokimi Payariq tumanida bo‘lib o‘tgan mazkur sayyor qabulida viloyat Elektr tarmoqlari korxonasi rahbarini tanqid qilib, viloyat prokuroriga korxona bosh muhandisi ishini ko‘rib chiqishni iltimos qildi.
“Sen noinsof glavniy injener, nima, quturganmisan? Bu yangi kelgan ekan, sen 10 yildan beri ishlab nima qilding? Nega odamlar faqat elektrdan dod deydi? Men viloyat prokuroridan hammaning oldida iltimos qilib so‘rayman, buning javobgarlik masalasini ko‘rib chiqishimiz kerak”, — deydi viloyat rahbari viloyat Elektr tarmoqlari korxonasi bosh muhandisi haqida gapirar ekan.
Erkinjon Turdimov viloyat Nazorat taftish boshqarmasi masʼuli Hatamov ismli mansabdorga bu ishni tekshirishi kerakligini aytib, “Hatamov to‘liq reviziya qilasan, hamma yo‘nalishlar bosh injinerga qaratilishi kerak. Bir haftadan so‘ng, menga olib kelasan, mening huzurimda bosh injinerning xatti-harakatlari bo‘yicha muhokama qilamiz”, — dedi.
Samarqand hokimi 1-iyul kuni Payariq tumanida yana sayyor qabul o‘tkazishini, barcha rahbarlar aholi murojaatini hal etgan bo‘lishi kerakligini uqtirdi.
“1-iyul kuni, ikki haftadan so‘ng, shanba kuni shu yerda sayyor qabul o‘tkazamiz. Fuqarolarning qaysi biri o‘tgan safar kelgandim, muammo yechilmadi desa, u odam bizning oramizda bo‘lishi kerakmas. Ayniqsa, Umid Nazarov. Tushundingmi? Davlatimiz rahbari Surxondaryoda hamma rahbarlarni almashtirgandi. Xuddi shunday Payariqda ham barcha rahbarlarni ishdan olamiz. Fuqarolar bilan muloqot qilishga layoqatsiz deb ishdan olamiz. Lekin tizimda ham ishlamaysan. Tizimda ishlatmaslik sharti bilan taqdimnoma kiritamiz”, — deydi viloyat hokimi.
“Daryo”ning aniqlashtirishicha, Umid Nazarov Samarqand viloyat Elektr tarmoqlari korxonasi rahbari vazifasida faoliyat yuritadi.
“Hammaning ustidan kulib, rahbar keladi-ketadi. Men doimiy deb o‘yladingmi? Nimaga ulgurmaysan, hamma viloyatlar ulguradi, faqat sen ulgurmaysan?”, — deydi viloyat rahbari Elektr tarmoqlari korxonasi bosh muhandisini tanqid qilar ekan.
Samarqand hokimi Payariq tumani hokimi boshchiligidagi sektor rahbarlariga muddat berib, tuman aholisini qiynab kelayotgan muammolarni yechish uchun viloyatdagi tashkilot rahbarlari ham ularga yordam berishini, biroz muddatdan so‘ng bu bo‘yicha ular shaxsan Turdimovning o‘ziga hisob berishi kerakligini uqtiradi.
“To‘rtta sektor, aytib qo‘yay, nechta murojaat tushgan bo‘lsa, kimning sektori bo‘lsa, har kuni so‘raysan. Viloyat rahbarlaridan ham so‘raysan. 10 kundan so‘ng mening oldimga borib, mana bular men aytgan ishni bajarmayapti deb aytishing kerak. Qaysi biringning sektoringda bo‘lsa, o‘zing javob berasan, viloyat rahbarlari ustidan ham nazorat o‘rnatasan, kerak bo‘lsa viloyat rahbarlari qabulxonangda borib o‘tiradi”, — deydi Erkinjon Turdimov.
Izoh (0)