Farg‘ona viloyatining Qo‘qon shahridagi savdo kompleksida 12-iyun kuni sodir bo‘lgan yong‘in bo‘yicha jinoyat ishi qo‘zg‘atildi. Bu haqda Bosh prokuratura matbuot kotibi xabar berdi.
FVV bergan ma’lumotga ko‘ra, 12-iyun kuni soat 19:17 da Qo‘qon shahar Baynalmilal ko‘chasida joylashgan “Buyuk ipak yo‘li” savdo kompleksi hududidagi do‘kon rastalarida yong‘in sodir bo‘layotgani to‘g‘risida FVBga xabar kelib tushgan.
Shunga asosan 10 ta yong‘in-qutqaruv ekipaji soat 19:25 da voqea joyiga yetib borgan. Yong‘in-qutqaruv bo‘linmalari tomonidan ko‘rilgan tezkor harakatlar natijasida yong‘in 20:25 da qurshab olinib, soat 23:30 da bartaraf etilgan.
Bosh prokuratura xabariga ko‘ra, holat yuzasidan Jinoyat kodeksining 259-moddasi (yong‘in xavfsizligi qoidalarini buzish) bilan jinoyat ishi qo‘zg‘atildi. Hozirda Farg‘ona viloyati IIB huzuridagi Tergov boshqarmasi tomonidan tergov harakatlari olib borilmoqda.
Izoh (0)