Toshkent shahrining Yangihayot tumanidagi 122-sonli davlat maktabgacha taʼlim tashkilotida uxlamayotgan bolalar oyog‘iga igna sanchilgani xabar berildi. Mazkur voqeaga munosabat bildirgan Toshkent shahar Maktabgacha va maktab taʼlimi boshqarmasi bu ishga qo‘l urgan amaliyotchi talaba qiz ayni paytda amaliyotdan chetlatilganini ochiqladi. “Daryo” jurnalisti mazkur voqeani o‘rganish maqsadida shu bog‘chada bo‘ldi.
“Bu guruh tarbiyachisi davolanishga ketgani bois uning o‘rnida 22-maydan boshlab ishlab turgandim. Voqea sodir bo‘lgani aytilayotgan kuni men yordamchi tarbiyachim kelmagani sabab idish-tovoqlarni yuvish bilan ovora bo‘lib qolganman. Bolalar oyog‘iga igna sanchilgani aytilayotgan voqea o‘sha paytda sodir bo‘lgan deyishmoqda. Amaliyotchi talaba men bilan bu guruhda ikki kun ishladi. O‘sha kuni ham uning idish-tovoq yuvishidan ko‘nglim to‘lmagani uchun uni uxlayotgan bolalarga qarovchi sifatida qoldirib, oshxonaga chala yuvilgan idishlarni yuvishga borgandim. Bundan judayam afsusdaman. 5-10 daqiqaga bo‘lsa ham bolalarni yolg‘iz qoldirmasligim kerak ekan”, — deydi bolalarning oyog‘iga igna sanchilgani aytilgan guruhning vaqtincha ishlab turgan tarbiyachisi Sojida Ergasheva.
Tarbiyachining aytishicha, voqea sodir bo‘lgan kuni bolalar yoniga qaytgach, hech qaysi bola oyog‘iga igna sanchilganidan yoki tarbiyachi opasi ularga urishganidan shikoyat qilmagan.
“Tozalik ishlarini tugatib bo‘lgach, bolalar yoniga qaytdim. Lekin hech qaysi bolaning yig‘lagani, opasidan shikoyat qilganini eshitmadim. Juma kuni eshitsam, ota-onalar guruhida bolalarning oyog‘iga igna sanchilgan aytilgan. Menga ham shu haqida aytishib, nega qaramadingiz deyishdi. Men bu haqda ulardan eshitayotganimni, o‘sha kuni bunaqa voqea yuz bermaganini aytdim”, — deydi guruh tarbiyachisi.
Sojida Ergasheva voqea haqida eshitgach, amaliyotchi talabadan bu haqda so‘rash imkoni bo‘lmaganini bildirmoqda.
Voqea sodir bo‘lgani aytilayotgan 122-sonli davlat maktabgacha taʼlim tashkiloti direktori Hadicha Mavlonova voqea sodir bo‘lgach, hudud profilaktika inspektori va MFY masʼullari holatni muhokama qilishganini, amaliyotchi talaba ham so‘roq qilinganini aytmoqda.
“O‘sha kuni Ichki ishlar bo‘limida bu haqda surishtiruv ishlari olib borildi. Surishtiruv ishlariga men, tarbiyachi, amaliyotchi talaba va ota-onalar ishtirok etishdi. Holat bo‘yicha sud tibbiy ekspertizasi tayinlandi. Hozircha tarbiyalanuvchilar oyog‘iga igna sanchilgani yoki sanchilmagani nomaʼlum. Ekspertiza xulosalarini kutyapmiz”, — deydi bog‘cha direktori.
Masʼulning qo‘shimcha qilishicha, voqea sodir bo‘lgan kuni haqiqatan ham amaliyotchi talaba shu guruhda bo‘lgan. Guruh tarbiyachisining yordamchisi o‘sha kuni sog‘lig‘idagi muammo sabab ishga kelolmagan.
“Daryo” muxbiri bilan suhbatda bo‘lgan Toshkent shahar Maktabgacha va maktab taʼlimi boshqarmasi masʼullari 20 yoshli amaliyotchi talaba qizdan bunday razillik chiqishiga ishonmasligini, holat o‘rganilmaguncha xulosa qilishga shoshilishmayotganini aytmoqda.
Farzandi jabrlanganini aytayotgan onalardan biri Dono Muzaffarovaning aytishicha, u bolasi oyog‘iga igna sanchilganini shanba kuni kechki payt bilgan.
“Shanba kuni kechki payt bolamni cho‘miltirish uchun yechintirganimda badanida igna izi borligini ko‘rdim va buni rasmga olib, ota-onalar guruhiga tashladim. Boisi bir necha kun bu haqda ota-onalar shikoyat qilgandi. Shu sabab bu haqda men ham xabar berib, ota-onalardan bolalarida bunaqa iz bor-yo‘qligini so‘radim. Biz ekspertizaga borganimizda igna izi deyishdi. Lekin hali rasmiy javobni olmadik”, — deydi u.
Holatni o‘rganayotgan paytimizda bir guruh onalar bog‘cha rahbariyati yoniga kelib, voqea o‘sha kuni kuzatuv kameralariga tushganini aytib, kamera yozuvlarini berishini talab qildi. Maktabgacha taʼlim tashkiloti rahbariyati esa ularni tinchlantirishga urinib, holat tasdiqlansa, aybdorlarga albatta chora ko‘rilishini bildirdi.
“Daryo” voqealar rivojini kuzatishda davom etadi.
Izoh (0)